बुटवल । रुपन्देहीको शंकरनगर वन विहार तथा अनुसन्धान केन्द्र भित्र बनेको वहुउद्देश्यीय भ्यू टावर उद्घाटन भएको २६ महिना बित्दासमेत सञ्चालनमा आउन सकेको छैन ।
तिलोत्तमा नगरपालिका र शंकरनगर वन विहार तथा अनुसन्धान केन्द्रको लागत साझेदारीमा कुल ११ करोड ५४ लाख ८१ हजार रूपैयाँमा बनेको उक्त टावर २०७८ चैत १५ गते उद्घाटन भएको थियो ।
निर्माणका काम बांकी रहंदै स्थानीय चुनावको मुखमा हतारमा उद्घाटन गरिएको भन्दै त्यतिबेलै आलोचना भएको थियो । तत्कालीन नगर प्रमुख बासुदेव घिमिरेको पालामा बनेको टावर एमालेका अध्यक्ष एवं हालका प्रधानमन्त्री केपी शर्मा ओलीबाट उद्घाटन भएको थियो ।
हतारमा उद्घाटन गरिएपनि २६ महिनासम्म सञ्चालनमा नआएपछि आलोचना बढ्न थालेको छ । उद्घाटनसंगै उक्त भ्यू टावर भवन बनाएका निर्माण व्यवसायी टोपबहादुर रायमाझीको कम्पनीले वार्षिक ३९ लाख ५० हजार नगरपालिकालाई बुझाउने गरी सञ्चालन गर्ने समझदारी भएपनि रायमाझीले टावर सञ्चालनमा ल्याएनन् ।
भ्यु टावर परिसरमा पार्किङ क्षेत्रमा इन्टरलक टायल लगाउने, स्वीमिङ पुल,वाटर फाउन्टेन र हरियाली (ग्रिनरी) का काम पूरा नभएको कारण देखाउंदै रायमाझीले भ्यू टावर सञ्चालन नगरेका हुन् । यी कामका लागि करिब २ करोड बजेट आवश्यक छ । तर संघीय सरकारले वजेट दिने भनेपनि दुई वर्षदेखि वजेट दिएको छैन । तिलोत्तमा नगरपालिकाले नयां वजेटमा ८० लाख रुपैयां छुट्टाएको छ ।
वजेट दिन नसकेपछि तीनपटक म्याद थप भएको नगरपालिकाका योजना प्रमुख इन्जिनियर प्रदीप वनले बताए । ‘संघीय सरकारको पर्यटन मन्त्रालयसंगको लागत साझेदारीको योजना भएकाले नगरपालिकाले आफ्नो हिस्सा भन्दा धेरै खर्च गर्न मिल्दैन,गरेमा शोध भर्ना हुंदैन,त्यसैले काम पूरा हुन नसकेको हो, यसैलाई बहाना बनाएर ठेकेदारले सञ्चालन गरेनन्’-प्रदीपले भने ।
यद्यपि रायमाझीले एक वर्षको भाडा वापतको धरौटी जम्मा र एक वर्षको बैंक ग्यारेन्टी गरेका छन् । तर सम्झौतापत्रमा हस्ताक्षर नगरी सञ्चालन पनि नगरेपछि नगरपालिकाले अब रायमाझीलाई यथाशीघ्र सञ्चालन गर्न आग्रह गर्ने र नमानेमा नयां ठेक्का प्रकृयामा जाने तयारी गरेको छ ।
सो टावर निर्माणमा तिलोत्तमा नगरपालिकाले ७० प्रतिशत र शंकरनगर वन विहार तथा अनुसन्धान केन्द्रले ३० प्रतिशत लागत साझेदारी गर्ने र आम्दानीको ६० प्रतिशत नगरपालिका तथा ४० प्रतिशत हिस्सा शंकरनगर वन विहार तथा अनुसन्धान केन्द्रले लिने समझदारी भएको थियो ।
तर कोरोना महामारीका कारण आम्दानी नभएपछि केन्द्रले एक करोड ५ लाख मात्र लगानी गरेको केन्द्रका उपाध्यक्ष खिमलाल पाण्डेले बताए ।
‘भ्यू टावर सञ्चालनमा आउंदा पर्यटकको संख्या बढ्थ्यो तर लामो समय बन्द अवस्थामा रहंदा एकातिर नकारात्मक सन्देश गएको छ अर्कोतिर नगरपालिकालाई हुने आम्दानी पनि गुम्ने अवस्था छ’-पाण्डे भन्छन् -‘अहिलेका ठेकेदारले चलाउन नसक्ने हो भने वनवाटिकाले चलाउन तयार छ, छिटो निणर्य हुनुपर्यो ।’
१ सय ३४ फिट उचाइ रहेको भ्यु टावर १० तलाको छ । कुल २५ हजार १ सय २२ वर्ग फिटमा निर्मित सो भ्यु टावरमा सुविधायुक्त रेष्टुराँ र पर्यटक विश्राम स्थल, रिसर्च रुम, डिपार्टमेन्ट स्टोर, कार्यालय कक्ष, शौचालयसहित लाइब्रेरीलगायत संरचनाहरू बनाइएको नगरपालिकाका योजना प्रमुख इन्जिनियर प्रदीप वनले बताए ।
तिलोत्तमा सहित देशभर १७ अर्ब लागतका भ्यु टावर बनेका छन् । तर तिनबाट लगानीको तुलनामा प्रतिफल नगण्य भएको छ । निर्माण व्यवसायी रायमाझीसंग यसबारे बुझ्न पटक पटक सम्पर्क गर्दा समेत उनी सम्पर्कमा आउन चाहेनन् ।
अब ठेक्का तोड्छौं ः नगरप्रमुख खांण
‘उद्घाटन भएको दुई वर्ष भन्दा धेरै समय बितिसक्दा पनि भ्यू टावर सञ्चालनमा आउन नसक्दा धेरैतिरबाट आलोचना खेप्नुपरेको छ ।
ठेकेदारलाई पटक पटक सम्पर्क गरेर सञ्चालन गर्न आग्रह गर्दा पनि बेवास्ता गरेको पाइयो । तर अब हामी कडाई गर्छौं, चलाउने भए चलाउनुस् नभए छाड्नुस् भनेर एकपटक अन्तिम कुरा गरेर नयां ठेक्का गर्छौं,साउन भित्र पुरानै ठेकेदारले चलाउने कि नयांले चलाउने भन्ने टुंगाएरै छाड्छौं ।’
