नेपाली कांग्रेसको केन्द्रीय कार्यसम्पादन समितिको बैठकले १५औं महाधिवेशन बैशाख २८—३१ मा गर्ने प्रस्ताव पारित गरेको छ । कार्यसम्पादन समितिको बहुमतले गरेको निर्णयलाई महामन्त्री द्वय गगन थापा र विश्वप्रकाश शर्मासहित पाँच जनाले असहमति जनाएका छन् । महमन्त्री थापासहितको असन्तुष्ट समूहले पुषभित्रै विशेष महाधिवेशन गर्ने बताएको छ । मुलुक चुनावमा होमिएको बेला महाधिवेशन गर्नु पार्टी र मुलुककै लागि राम्रो नहुने भन्दै संस्थापनले चुनावपछिको तालिका सार्वजनिक गरेको हो । चुनावपछि महाधिवेशन गर्ने संस्थापनको जोडबललाई विशेष महाधिवेशन गरी चुनौती दिने महामन्त्री द्वयको अडानले कांग्रेसभित्रको अन्तरसंघर्ष पेचिलो बनेको छ ।
कांग्रेस पुरानो लोकतान्त्रिक पार्टी हो । लामो लोकतान्त्रिक अभ्यास गर्दै आएको पार्टी भए पनि आन्तरिक राजनीति दाउपेचमै चल्दै आएको छ । स्वच्छ र शालिन लोकतान्त्रिक अभ्यासको अपेक्षा राख्नेहरुका लागि कांग्रेसभित्रको राजनीति पेचिलो बन्नु स्वभाविक छैन । जेनजी आन्दोलनपछि नेतृत्व परिवर्तन हुनुपर्ने भन्दै दबाब बढाएका महामन्त्री गगन थापासहितको समूहले विशेष महाधिवेशनका लागि हस्ताक्षर अभियान चलायो । बहुमत महाधिवेशन प्रतिनिधिले विशेष महाधिवेशनको माग गर्दै हस्ताक्षर गरे । तर कांग्रेसमा महाधिवेशन विशेष कि नियमित भन्ने प्रश्नको निर्णय गर्नकै लागि एक महिनाभन्दा लामो केन्द्रीय समितिको बैठक बस्यो । अन्ततः नियमित महाधिवेशन गर्ने र चुनावअघि नै गर्ने निर्णय भयो, तर चुनावअघि महाधिवेशन गर्ने अवस्था देखिएन् ।
अन्ततः चुनावपछि महाधिवेशन गर्ने तयारी हुँदैछ । उपचारका लागि सिंगापुर पुगेका सभापति शेरबहादुर देउवा कार्तिक अन्तिम साता स्वदेश फर्केपछि अनिर्णित कांग्रेस निष्कर्षमा त पुग्यो, तर त्यो निष्कर्षले विवादको समाधान दिएन् । अहिले महाधिवेशन चुनाव अघि कि पछि भन्ने विवाद बल्झेको छ । कांग्रेसको विवाद खासमा चुनावमा टिकट वितरणमा कसको पल्लाभारी हुने भन्ने विषय प्रधान हो । यही अवस्थामा संस्थापन पक्षले नै देशभर बर्चश्व कायम गर्ने भयले नेतृत्व परिर्वतनका लागि इतर पक्ष हतारमा देखिएको छ । पार्टी सभापति देउवा अब सभापति नहुने प्रष्टसँग बताइसकेकाले उनको सम्मानजनक बर्हिगमनका लागि पार्टी पंक्ति तयार रहनु राम्रो हो । त्यसो भएन भने सहमतिमै विशेष महाधिवेशनका लागि कांग्रेस तयार हुनुपर्छ । मुलुक र लोकतन्त्रलाई संकट परेका बेला कांग्रेस झगडामा फस्दा त्यसको मूल्य मुलुकले चुकाउनुपर्नेछ ।
दलहरुबिचको सहकार्य अपरिहार्य भएका बेला दलभित्रको एकता र सहकार्य पनि उत्तिकै आवश्यक छ । कांग्रेस सभापति देउवाले अहिले एमाले र नेकपासहितका दललाई सँगै लिएर हिड्ने योजना बनाएका छन् । राष्ट्रिय सभाको आगामी चुनावमा सहकार्यको सुरुवात गरी आगामी चुनावसम्मै लैजाने योजना बुनेका देउवाले पार्टीभित्रको एकता कायम गर्न सक्दा मात्रै दलीय सहकार्य र एकतालाई कार्यान्वयन गर्न सक्छन् ।
