बुटवल । नेपाल बिलियर्डस् पुल तथा स्नूकर संघ रुपन्देहीको आयोजनामा बुटवलमा सम्पन्न नवौं जिल्लास्तरीय खुल्ला स्नूकर प्रतियोगिताको उपाधि अजय सुनारले जितेका छन् ।
बुटवलस्थित खस्यौली स्नूकर क्लबमा सोमबार सम्पन्न फाइनल खेलमा रुकु खानलाई ५–१ ले पराजित गर्दै अजयले उपाधि जितेका हुन् । उपाधिसंगै उनले एक लाख रुपैयां नगद पुरस्कार जितेका छन् । उपविजेता रुकुले नगद ५० हजार पाएका छन् । स्नूकरको जिल्लास्तरीय प्रतियोगिताको विजेताले पाउने यसपटकको पुरस्कार राशी हालसम्मकै सर्वाधिक हो ।
एक हप्तासम्म सञ्चालन भएको प्रतियोगितामा रोहितमान जोशी राइजिङ प्लेयर र सौरभ श्रेष्ठ अनुशासित खेलाडी भए । उनीहरुले नगद ५÷५ हजार र स्नूकर स्टिक प्राप्त गरे । प्रतियोगिताका विजयी खेलाडीहरुलाई सोमबार नै पुरस्कार तथा प्रमाणपत्र प्रदान गरिएको छ ।
कार्यक्रममा स्नूकर खेलको विकासमा योगदान दिएवापत चिरन्जिवी जोशी,बुटवल नगर खेलकुद विकास समिति संयोजक बोनिन पिया, निर्णायक दिवस राना र पत्रकार प्रदीप आचार्यलाई दोसल्ला र कदरपत्र सहित सम्मान गरिएको थियो । यस्तै प्रतियोगिता सम्पन्न गर्न सहयोग गर्ने व्यक्ति र संस्थालाई पनि सम्मान गरिएको थियो ।
समापन कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेले स्नूकर खेलको विकासका लागि उपमहानगरले कभर्ड हल बनाइदिने प्रतिवद्धता व्यक्त गर्दै जग्गा खोजीमा लाग्न संघलाई आग्रह गरे । उनले बुटवल उपमहानगरले देशभरकै स्थानीय तहमा सबैभन्दा धेरै वजेट खेलकुदलाई छुट्टाउने गरेको बताए ।
संघका अध्यक्ष सुजन पुनले बुटवल उपमहानगरपालिकामा २०७९ को चुनावबाट नयां नेतृत्व आएपछि मात्रै बुटवलमा जिल्लास्तरीय र राष्ट्रियस्तरको प्रतियोगिता भब्यताका साथ सम्पन्न गर्न सहज भएको बताए । उपमहानगरको सहयोगका कारण रुपन्देही जिल्ला स्नूकर खेलमा देशभरमै अग्रणी स्थानमा आउन सफल भएको अध्यक्ष पुनले बताए ।
सो अवसरमा बुटवलकी उपमेयर सावित्रादेवी अर्याल, प्रथम पुरस्कारको सौजन्यकर्ता समाजसेवी चुन्नुप्रसाद पौडेल, लगायतले बोदै स्नुकर खेल अन्तर्राष्ट्रिय जगतमा प्रतिष्ठित खेल भएपनि नेपालमा ओझेलमा परेकाले अब तीनै तहका सरकारको ध्यान जानुपर्ने बताए । समापन कार्यक्रममा संघका वरिष्ठ उपाध्यक्ष वासु प्रधान, महासचिव प्रकाश क्षेत्री लगायतले आफ्ना भनाई राख्दै प्रतियोगिता सम्पन्न गर्न सहयोग पु¥याउने सबैलाई धन्यवाद ज्ञापन गरेका थिए ।
