बोनिन पिया
संयोजक
बुटवल उप–महानगर खेलकुद विकास समिति
युवा उद्यमी बोनिन पिया अहिले बुटवल उप–महानगर खेलकुद विकास समितिका संयोजक छन् । पिया ब्याडमिन्टनका राम्रो खेलाडी समेत हुन् । काम गर्ने हुटहुटी भएका र जिम्मेवारी प्राप्त काम कुशलतापूर्वक पूरा गर्ने छवि बनाएका व्यक्ति हुन्, उनी । पिया नेतृत्वको बुटवल उप–महानगरपालिका खेलकुद विकास समितिले नियमित राष्ट्रपति रनिङ शिल्ड आयोजना गर्दैछ । नगरस्तरीय यो प्रतियोगिताको व्यवस्थापन चुस्त बनाउन पियाकै नेतृत्वलाई श्रेय जान्छ । यही पुष २७ गतेदेखि यहाँ हुन लागेको राष्ट्रपति रनिङशिल्ड प्रतियोगिता र बुटवलको खेल पूर्वाधारका बारेमा पियासँग लुम्बिनीकर्मीले गरेको कुराकानीः
राष्ट्रपति रनिङ शिल्ड आयोजना गर्नुको उद्देश्य के हो ?
राष्ट्रपति रनिङ शिल्ड प्रतियोगिता विद्यालय तहका विद्यार्थीहरूमा खेलकुदको विकास, प्रतिभा पहिचान र स्वस्थ जीवनशैली प्रवद्र्धन गर्ने उद्देश्यले सुरु गरिएको राष्ट्रियस्तरको प्रतियोगिता हो । यो प्रतियोगिता राष्ट्रपति संस्थाको संरक्षकत्व र शिक्षा तथा खेलकुद क्षेत्रको सहकार्यमा विद्यालय तहका खेलाडीको क्षमता विकास र प्रतिभा प्रस्फुटन गर्ने उद्देश्यले निरन्तर सञ्चालन हुँदै आएको छ ।
बुटवल उप–महानगरपालिकाले कसरी आयोजना गर्दैछ ?
बुटवल उप–महानगरपालिकाले यो प्रतियोगितालाई यस क्षेत्रकै उत्कृष्ट र भव्य खेलकुद प्रतियोगिताका रूपमा सञ्चालन गर्दै आएको छ । पूर्व तयारी, सक्रियता र उत्साहको प्रतिफल बुटवल उप–महानगरपालिकाले जिल्लामै उत्कृष्ट स्थान हासिल गर्दै आएको छ । अहिले हामीले सातांै राष्ट्रपति रनिङ शिल्ड प्रतियोगिता—२०८२ आयोजना गर्न लागिरहेका छौँ । यस वर्षको प्रतियोगिता एन्फा टेक्निकल सेन्टर, बुटवल–११ देवीनगरमा यही पुष २६ गतेदेखि २८ गतेसम्म सञ्चालन हुँदैछ ।
प्रतियोगितामा बुटवल उप–महानगरपालिकाभित्रका ४२ विद्यालयबाट छात्र ९ सय १, छात्रा ६ सय ७ गरी १ हजार ५ सय ८ विद्यार्थीले भाग लिएका छन् । एथलेटिक्सतर्फ(दौड, ज्याभ्लिङ थ्रो, सटपुट, लङ्ग जम्प, त्रिपल जम्प) कराँतेतर्फ ६ र तेक्वादोतर्फ ६ वटा तथा भलिबल र कबड्डी खेल विधाहरूमा ३ सय ५० जना खेलाडीहरू पुरस्कृत हुने छन् । बुटवलमा आयोजना हुने यो खेलकुद मेलामा बुटवलका विद्यार्थीहरूको उत्कृष्ट प्रतिभा हेर्न सकिन्छ । यसलाई हामीले बुटवलकै उत्कृष्ट खेलकुद प्रतियोगिताको रूपमा आयोजना गर्दै आएका छौँ ।
प्रतियोगितामा उत्कृष्टलाई के–कस्तो पुरस्कारको व्यवस्था छ ?
बुटवल उप–महानगरपालिकाले प्रतियोगितामा एथलेटिक्स, कराँते र तेक्वान्दोतर्फ प्रथम, द्वितीय र तृतीय हुने छात्रछात्रा खेलाडीलाई जनही क्रमशः २ हजार, १ हजार ५ सय र १ हजार रुपैयाँका दरले नगद पुरस्कार, प्रमाणपत्र र मेडल प्रदान गरिनेछ ।
भलिबलतर्फ प्रथम हुनेलाई १५ हजार रुपैयाँ, द्वितीय हुनेलाई ७ हजार ५ सय र तृतीय हुनेलाई ५ हजार रुपैयाँ र कबड्डीतर्फ प्रथम हुनेलाई १५ हजार रुपैयाँ, द्वितीय हुनेलाई ७ हजार ५ सय रुपैयाँ र तृतीय हुनेलाई ३ हजार ५ सय रुपैयाँका दरले दुई वटा टिमलाई नगर पुरस्कार, शिल्ड र मेडल तथा प्रमाणपत्र प्रदान गरिनेछ ।
साथै मार्चपास र्याली प्रदर्शनमा प्रथम पुरस्कार २५ हजार रुपैयाँ, द्वितीय पुरस्कार १५ हजार रुपैयाँ र तृतीय पुरस्कार १० हजार रुपैयाँ प्रदान गरिनेछ । समूह नाच र पि.टी. ड्रील प्रदर्शनको लागि नगद तथा प्रमाणपत्रको व्यवस्था गरिएको छ । खेलाडीको सुरक्षार्थ खेल अवधिभरको लागि सामुहिक बीमाको व्यवस्था गरिएको छ ।
यो प्रतियोगिताको उपलब्धि केलाई मान्नुपर्छ ?
यो प्रतियोगिताले विद्यालयस्तरमै लुकेका खेल प्रतिभा उजागर गर्न, अनुशासन, टिम भावना र प्रतिस्पर्धात्मक क्षमताको विकास गर्न महत्वपूर्ण भूमिका खेल्दै आएको छ । नयाँ प्रतिभाको खोजी गर्न सकिने यो प्रतियोगिताले थुप्रै खेलाडी जन्माउँदै आएको छ । खेलकुदमार्फत् विद्यार्थीहरूको शारीरिक तथा मानसिक विकासमा योगदान पुर्याउने लक्ष्य र उद्देश्यसहित विद्यालय तहबाट प्रतिस्पर्धामा सहभागी हुने विद्यार्थीलाई स्थानीय तह, प्रदेश र राष्ट्रियस्तरमा उत्कृष्ट हुनका लागि मद्दत पुर्याउने कुरामा विश्वस्त छौँ ।
खेलकुदमा बुटवल उप–महानगरपालिकाको लगानी के–कस्तो छ ?
बुटवललाई खेलकुदको हव बनाउन उप–महानगरपालिकाले खेलकुदको क्षेत्रमा योजनाबद्ध ढंगले लगानी गरिरहेको छ । बुटवल उप–महानगरपालिका प्रमुख खेलराज पाण्डेको खेलको विकास गर्न प्रष्ट भिजन छ ।
यो वर्ष ४ करोड रुपैयाँ बजेट विनियोजन भएको छ । प्रत्येक वर्ष खेलकुदमा पर्याप्त लगानी हुँदै आएको छ । यो लगानी पूर्वाधार र विभिन्न प्रतियोगिता आयोजना गर्न खर्च भइरहेको छ । विद्यालयमा शिक्षासँगै खेलकुद गतिविधि अघि बढाउन खेलकुद शिक्षकको नियुक्तिलाई जोड दिइएको छ । विद्यालय तहमा कराँते, कपर्दी, तेक्वाक्दोलगायतका प्रतियोगिता निरन्तर भइरहेका छन् ।
बुटवलमा खेल पूर्वाधारको अहिलेको अवस्थालाई कसरी हेर्नुहुन्छ ?
बुटवलमा खेल पूर्वाधारको विकास गर्न सके यो क्षेत्रको विकासमा ठूलो टेवा पुग्छ भन्ने विश्वास लिएका छौँ । बुटवललाई खेलकुदको हब बनाउन पूर्वाधार विकास अनिवार्य छ । सेमलारमा क्रिकेट मैदान बनाउन डीपीआरको लागि नक्शाङ्कन हुने गरी काम भएको छ । जबई खेल मैदानलाई व्यवस्थित गर्ने काम अघि बढेको छ ।
त्यसका लागि उप–महानगरपालिकाले १ करोड २० लाख विनियोजन गरेको छ । भलिबलको लागि इनडोर कर्भडहलको लागि जग्गा खोजी गरिरहेका छौँ । यी काम पूरा गर्न सक्दा बुटवलमा खेल पूर्वाधारको जग तयार हुन्छ ।
