बालबालिकाको प्रतिभा पहिचान र स्वस्थ जीवनशैली प्रवर्धन गर्ने उद्देश्यले सरकारले वर्षेनी राष्ट्रपति रनिङ शिल्ड प्रतियोगिता आयोजना गरिरहेको छ । विद्यालय तहमा खेलकुदका गतिविधि सञ्चालन हुँदा त्यसले उनीहरूको पठनपाठनमा पनि सकारात्मक प्रभाव पार्छ । हरेक पालिकाभित्र विद्यालय तहस्तरीय खेलकुद प्रतियोगिता सञ्चालन गर्न संघीय सरकारले जुन प्रयास गरेको छ, यसले खेलकुद स्वस्थ जीवनका लागि अनिवार्य भन्ने सन्देशलाई व्यवहारिक कार्यान्वयनमा बल पुगेको छ । खेल क्षेत्रमा न्यून लगानी र पूर्वाधार विकास भएका बेला यो प्रतियोगिताले सकारात्मक सन्देश दिएको छ ।
हुने बिरूवाको चिल्लो पात भनेझैँ कुनै विषयमा अब्बल हुनेहरू सानैदेखि त्यस्तो लक्षण देखाएका हुन्छन् । कुनै व्यक्तिभित्र रहेको प्रतिभा बाहिर निकाल्न अनुकुल वातावरण आवश्यक हुन्छ । अझ बालबालिकामा सिक्ने, जान्ने र आफ्नो क्षमता बाहिर ल्याउने हुटहुटी तीब्र हुन्छ । घरपरिवार, समाज र विद्यालयले उनीहरूको क्षमता बाहिर ल्याउन अनुकुल वातावरण बनाइदिने हो भने उनीहरूभित्र रहेको क्षमता बाहिर आउँछ । बालबालिका प्रवल सम्भावनाका खानी हुन् । त्यो सम्भावनालाई चिन्ने र चिनाउने अवसर दिने वातावरण तयार गर्न सक्दा अब्बल देखिन सक्छन्, त्यसले समाज र मुलुकलाई सकारात्मक प्रभाव पार्न सक्छ । उनीहरू अरूका लागि पनि प्रेरणापुञ्ज बन्न सक्छन् । राष्ट्रपति रनिङ शिल्ड प्रतियोगिता त्यस्तै प्रेरणापुञ्ज बन्न सक्छ । खेल व्यक्तिको जीवनमा अनिवार्य आवश्यक छ, अझ बालबालिकाको शारीरिक र मानसिक विकासका लागि अपरिहार्य छ ।
बुटवल उप–महानगरपालिकाले राष्ट्रपति रनिङ शिल्ड प्रतियोगिता पुष २६ गतेदेखि २८ गतेसम्म आयोजना गरेको छ । प्रतियोगितामा बुटवल उप–महानगरपालिकाभित्रका ४२ विद्यालयबाट छात्र ९ सय ८१, छात्रा ६ सय ७ गरी १ हजार ५ सय ८८ विद्यार्थीले भाग लिएका छन् । एथलेटिक्सतर्फ(दौड, ज्याभ्लिङ थ्रो, सटपुट,लङ्ग जम्प, त्रिपल जम्प) कराँतेतर्फ ६ र तेक्वादोतर्फ ६ वटा तथा भलिबल र कबड्डी खेल विधाहरूमा ३ सय ५० जना खेलाडीहरू पुरस्कृत हुनेछन् । बुटवलमा आयोजना हुने यो खेलकुद मेलामा बुटवलका विद्यार्थीहरूको उत्कृष्ट प्रतिभा हेर्ने अवसर हो । यो प्रतियोगितामा सहभागी हुने विद्यालयको संख्या वर्षेनी बढिरहेको छ । प्रतियोगितामा सहभागी विद्यालय र विद्यार्थीको उत्साहले प्रतियोगिता आयोजना गर्नुको औचित्य पुष्टि भएको छ । बालबालिकामा पठनपाठनमा मात्रै नभई अरू विषयमा पनि प्रतिस्पर्धी बन्न प्रेरणा मिलेको छ ।
प्रतियोगितालाई विवादमुक्त बनाउन आयोजकले ध्यान दिनुपर्छ । प्रतिस्पर्धी वातावरण तयार गरी जीत हासिल गर्नु स्वभाविक हो । तर जित्दा ठिकै तर जित्न नसक्दा अराजक अवस्था निम्तिने जोखिम बढ्दै गएको छ । समाजमा बढ्दो यस्तो अराजकता यहाँ पनि सल्किन सक्छ । स्वच्छ प्रतिस्पर्धा नै खेलको सर्वोत्तम नियम भएकाले यो नियमको पालना नै महत्वपूर्ण हुन्छ । नयाँ पुस्तालाई राम्रो संस्कार दिन सक्नु नै राम्रो उपलब्धि हो । अझ यो प्रतियोगिता सञ्चालन भएको केही वर्ष बितेकाले प्रतियोगिताका कमिकमजोरीलाई सुधार गर्दै अब्बल बनाउन पहलकदमी लिनुपर्छ । राष्ट्रपति संस्था जोडिएको प्रतियोगिता भएकाले पनि संस्थाको गरिमा र प्रतिष्ठाको पनि ख्याल गर्नुपर्छ ।
