जेनजी आन्दोलनमा प्रहरी हिरासतबाट फरार भएर काठमाडौं उपत्यकामा लुटपाट गर्ने १० जनाको एउटा समूहलाई प्रहरीले पक्राउ गर्न सफल भएको छ । उनीहरुले २७ ठाउँमा लुटपाट गरेको प्रारम्भिक अनुसन्धानमा प्रहरीले पत्ता लगाएको छ । जिल्ला प्रहरी परिसर काठमाडौंले गोली चलाएर बिहीबार बिहानीपख १० जनालाई पक्राउ गरेपछि अनुसन्धान गर्दा यसका मुख्य नाइके नै जेनजी आन्दोलनको मौकामा हिरासतबाट फरार भएको खुलेको हो ।
विभिन्न अपराधिक कर्ममा सहभागी भई प्रहरी हिरासतमा परेका उनीहरु हिरासत तोडेर फरार रहेका उनीहरु पुनः अपराधिक क्रियाकलापमा संलग्न भएको यो तथ्यले हिरासत र कारागारबाट भागेका अरु कैदी बन्दी समेत अपराधिक क्रियाकलापमा सहभागी भएको हुनसक्ने आँकलन गर्न सकिन्छ । रवि लामिछानेले जेलबाट बाहिर निस्केपछि अरु कैदी बन्दी समेत जेलबाट निस्केका थिए । तीमध्ये अझैं ७ सयको हाराहारीमा कैदी बन्दी जेलमा नफर्केको जेल प्रशासनको भनाइ छ । नख्खु कारागारबाट भागेका एक व्यक्तिले काभ्रेको पनौतीमा श्रीमतीको हत्या गरेका छन् । यस्ता केही घटनाले समाजमा अपराधको डरलाग्दो ग्राफ बढ्न सक्ने देखिन्छ । डाँका चोरी मुद्दामा पक्राउ परी प्रहरी वृत्त महाराजगञ्ज हिरासतमा रहेका काभ्रे भुम्लु गाउँपालिका–३ घर भएका २३ वर्षीय विनय तामाङले जेनजी आन्दोलनको मौकामा हिरासतबाट फरार भए । उनले नै समूह खडा गरी उपत्यकामा लुटपाटको आतंक मच्चाएको प्रहरी अनुसन्धानबाट खुलेको छ । पक्राउ परेका सबै विगतमा लुटपाटलगायत विभिन्न अपराधिक क्रियाकलापमा संलग्न भएको देखिन्छ । अझ उनीहरु दिउँसो रेकी गरी लुटपाटको योजना बनाउने र राति लुटपाट गर्ने पाइएको छ । एकजना ट्याक्सी चालक रहेको र उनले आफ्ना ग्राहकको घर र अरु गतिविधि निगरानी गरेर लुटपाटको योजना बनाएको प्रहरी अनुसन्धानबाट खुलेको छ ।
प्रहरीको मनोबल खस्केको र समाजिक एकता, सद्भाव र हार्दिकता खल्बलिएको मौकामा अपराधीको मनोबल बढ्ने भएकाले समाजमा अपराधिक क्रियाकलाप धेरै हुन्छ । अपराध नियन्त्रणको लागि प्रहरीलाई साधन स्रोतको जति आवश्यक हुन्छ, मनोबल सबैभन्दा ठूलो कुरा हो । मनोबल उच्च भएको प्रहरीले मात्रै समाजमा भरोसा र विश्वास जित्न सक्छ ।
मनोबल खस्केको भनिएको प्रहरीको मनोबल विस्तारै उठ्दैछ । प्रहरीले काठमाडौंबाट नौ घण्टा लामो अप्रेशन चलाएर लुटपाटको एउटा गिरोह पक्राउन गर्न सफल भएर नागरिकको विश्वास जित्न सफल भएको छ । र , एउटा सन्देश दिएको छ, प्रहरीको खस्केको मनोबल विस्तारै जुरुक्क उठ्दै छ । यो अप्रेशनको सन्देश प्रहरी कमजोर छैन, अपराधी जुनसुकै समयमा पक्राउ पर्न सक्छन् भन्ने पनि हो ।
काठमाडौंमा लुटपाटमा संलग्न यी व्यक्तिको पक्राउ सामान्य अवस्थामा धेरै चर्चाको कुरा नहुनसक्छ । तर प्रहरीप्रति अविश्वास भएको बेला यो सफल कारबाहीले विश्वास जगाएको छ । प्रहरीलाई अपराध नियन्त्रण गर्न सबैले सहयोग गर्न आवश्यक छ, प्रहरीको एक्लो प्रयासले मात्रै समाजमा अपराध नियन्त्रण सम्भव छैन ।
