बुटवल । ल्याण्डमार्क एजुकेशन कन्सलटेन्सीले आफ्नो २६ औं स्थापना दिवसका अवसरमा आयोजना गरेको स्पेल–बी च्याम्पियनसिपको उपाधि बुटवलको कान्ति माविले जितेको छ । ल्याण्डमार्कले शनिबार बुटवलमा आयोजना गरेको प्रतियोगितामा २३ वटा विद्यालयलाई पछि पार्दै उपाधि विजेता कान्ति माविका विद्यार्थीले नगद २० हजार पुरस्कार प्राप्त गरेका छन् । 
प्रतियोगी विद्यालयहरुबाट कक्षा ११ र १२ मा अध्ययनरत उत्कृष्ट ५÷५ जना विद्यार्थीहरु बीच अँग्रेजी शब्दको स्पेलिङ भन्ने यो प्रतियोगितामा मणिमुकुन्द कलेज द्वितीय तथा न्यू होराईजन माध्यमिक विद्यालय तृतीय हुँदै क्रमशः १० हजार र ५ हजार नगद पुरस्कार प्राप्त गरेका ल्याण्डमार्क बुटवल शाखा प्रमुख सागर बस्यालले जानकारी दिए । विद्यार्थीमा अध्ययन गर्ने बानीको बिकास तथा शैक्षिक संस्थाहरुबीच आपसी सम्बन्ध बिस्तार गर्ने उद्देश्यसहित तेस्रो संस्करणको रुपमा यो प्रतियोगिता सम्पन्न गरिएको बस्यालले बताए । 
प्रतियोगितामा विजेता विद्यार्थीहरुलाई तिलोत्तमा क्याम्पसका पूर्व प्रमुख प्रा.डा. आरसी आचार्य,  न्यू होराइजन माविका सह–प्राचार्य इन्द्र भुसाल र ल्याण्ड मार्कका सञ्चालक तथा इम्पेरियल वल्र्ड स्कुल काठमाण्डौंका सञ्चालक कुमार कार्कीले पुरस्कार वितरण गरेका थिए । 
अस्ट्रेलिया तथा नेपालका ५ शहरमा शाखा कार्यालय रहेको ल्याण्डमार्कले अस्ट्रेलिया, क्यानडा, यूके र यूएस जाने विद्यार्थीहरुलाई परामर्श सेवा प्रदान गर्दै आएको छ । वार्षिक १ हजार बढी विद्यार्थीलाई परामर्श सेवा प्रदान गरी विदेश अध्ययनका लागि पठाउने गरेको यस संस्थाले आर्थिक रुपमा कमजोर विद्यार्थीलाई विदेश अध्ययनका लागि ऋण लगानी आवश्यक परेमा समन्वय समेत गर्ने गरेको छ ।