बुटवल । देशव्यापी चेन भएको भाटभटेनी सुपर मार्केटका ग्राहकले लुम्बिनी केबलकारको टिकटमा २० प्रतिशत छुट पाउने भएका छन् । भाटभटेनीको बुटवल शाखा र लुम्बिनी केबलकार लि. बुटवलबीच शुक्रबार छुट सम्बन्धी सम्झौता भएको हो । सम्झौता अनुसार भाटभटेनीमा एक हजार रुपैयां बराबरको सामान खरिद गर्ने ग्राहकले एउटा कुपन पाउने छन् । उक्त कुपन लिएर आउने ग्राहकले लुम्बिनी केबलकारको ७५० रुपैयांको टिकट दरमा २० प्रतिशत छुट पाउने छन् । सम्झौतापत्रमा लुम्बिनी केबलकारका तर्फबाट स्टेशन म्यानेजर डिएन कायस्थ सैंजू र भाटभटेनीका तर्फबाट बुटवल शाखा प्रबन्धक रोशनी अधिकारीले हस्ताक्षर गरेका छन् ।
एक हजारको सामान खरिदमा एउटा कुपन पाए अनुसार ग्राहकहरुले दुई हजारको सामान किन्दा दुई वटा र एवं रितले खरिद अनुसार कुपन पाउने केबलकारका व्यवस्थापक प्रज्ज्वल घिमिरेले बताए ।
केबलकारका स्टेशन म्यानेजर कायस्थले बजार प्रवद्र्धनका लागि संस्थाले विभिन्न व्यवसायिक,शैक्षिक र अन्य संघसंस्थासंग सम्झौता गरेर छुट सुविधा दिने गरेको बताए ।
भाटभटेनीकी शाखा प्रबन्धक रोशनी अधिकारीले लुम्बिनी प्रदेशकै पहिलो र नेपालको दोस्रो लामो तथा पर्यटकको पहिलो रोजाईको लुम्बिनी केबलकारसंगको सम्झौताले भाटभटेनीका ग्राहकहरु लाभान्वित हुने बताइन् ।
आईएमई ग्रुपको नेतृत्वमा स्थानीय समेतको गरी डेढ अर्ब लगानीमा सञ्चालित केवलकारमा साढे दुई वर्ष बढी अवधिमा करिब पांच लाख पर्यटक भित्रिएको कम्पनीले जनाएको छ । जसमा भारत उत्तर प्रदेशका विभिन्न शहरबाट केवलकार चढ्न र घुम्न आउनेको संख्या उल्लेख्य छन् ।
केवलकारको माथिल्लो स्टेशनमा प्रख्यात शक्तिपीठ कामाख्यादेवी मन्दिर र सय वर्षदेखि पुजाआजा हुँदै आएको दुर्गा मन्दिर,जीपलाइन, स्काई साइक्लिङ, ज्वायन्ट स्वीङ, बाल उद्यान, भ्यू प्वाइन्ट, रेष्टुंरा, सेमिनार हललगायत धार्मिक र पर्यटकीय संरचना बनेकाले पर्यटकलाई दिनभर घुम्ने र रमाउने वातावरण बनेको छ ।
केवलकारले जन्मदिनमा निःशुल्क यात्रा, हरेक महिनाको १ गते साँझ महाआरती अफर, ५० जनाभन्दा बढी समूहमा आउनेलाई विशेष छुट अफर लगायत विभिन्न संघसंस्थासँग टिकट दरमा छुटको सम्झौता गरी बजार प्रवर्धन गरिरहेको अपरेसन म्यानेजर सैंजूले बताए ।
