बुटवल । बुटवलको लुम्बिनी आई केयर सेन्टर ( आंखा उपचार केन्द्र) का सेवाग्राही ग्राहकहरुले लुम्बिनी केबलकार लि.को टिकटमा छुट पाउने भएका छन् ।
केबलकारको टिकट दरमा छुट र दुई संस्थाबीच अन्य व्यवसायिक प्रवद्र्धन सम्बन्धी सोमबार सम्झौता पत्रमा हस्ताक्षर भएको छ । सो सम्झौता अनुसार लुम्बिनी आई केयरका सञ्चालक र कर्मचारीहरुले परिचयपत्रको आधारमा केबलकारको टिकट खरिदमा २० प्रतिशत छुट पाउनेछन् भने आई केयरमा आंखा जांच र चश्मा खरिद गर्न आउने ग्राकहले एक हजार रुपैयां बराबरको उपचारमा खर्च गरेको बिल देखाएमा पनि केबलकारको टिकटमा २० प्रतिशत छुट पाउने छन् ।
सेवाग्राहीले आंखा चेकजांच र चश्मा आदि खरिद गरेको दुई महिनाभित्र उक्त छुट पाउनेछन् । यस्तै केबलकारका ग्राहकले पनि टिकटका आधारमा र कर्मचारीले परिचयपत्रका आधारमा लुम्बिनी आईकेयरमा डाक्टर फी,औषधि र चश्मा खरिदमा २० प्रतिशत सम्म छुट पाउने छन् । दुबै पक्षले दिने छुट सम्बन्धी सम्झौता पत्रमा सोमबार हस्ताक्षर भएको छ । केबलकारको तर्फबाट स्टेशन म्यानेजर डिल्लीनारायण (डिएन) कायस्थ र लुम्बिनी आई केयर सेन्टरका तर्फबाट प्रोप्राइटर विश्वास भण्डारीले हस्ताक्षर गरेका छन् ।
सम्झौतापछि बोल्दै केबलकारका स्टेशन म्यानेजर कायस्थले केबलकारमा आन्तरिक पर्यटक आगमन बढाउन संस्थाले विभिन्न व्यवसायिक,शैक्षिक र अन्य संघसंस्थासंग सम्झौता गरेर छुट सुविधा दिने गरेको बताए ।
लुम्बिनी आई केयर सेन्टरका प्रोप्राइटर विश्वास भण्डारीले लुम्बिनी प्रदेशकै पहिलो र अत्याधुनिक प्रविधिको भएकाले पर्यटकको पहिलो रोजाईमा परेको लुम्बिनी केबलकारसंगको सम्झौताले आफ्ना ग्राहकहरु लाभान्वित हुने बताए ।
केवलकारले सामाजिक उत्तरदायित्व अन्तर्गत जन्मदिन परेको दिनमा जो सुकैलाई जन्म मिति खुल्ने सरकारी कागजपत्रको आधारमा निःशुल्क यात्रा, हरेक महिनाको १ गते साँझ महाआरती अफर, ५० जनाभन्दा बढी समूहमा आउनेलाई विशेष छुट अफर दिने गरेको प्रबन्धक प्रज्ज्व्ल घिमिरेले बताए ।
नेपालकै दोस्रो लामो लुम्बिनी केबलकारको माथिल्लो स्टेसनमा प्रख्यात शक्तिपीठ कामाख्यादेवी मन्दिर र सय वर्षदेखि पुजाआजा हुँदै आएको दुर्गा मन्दिर, जीपलाइन, स्काई साइक्लिङ, ज्वायन्ट स्वीङ, बाल उद्यान, भ्यू प्वाइन्ट, रेष्टुंरा, सेमिनार हललगायत धार्मिक र पर्यटकीय संरचना छन् ।
समुन्द्री सतहदेखि एक हजार मिटर उचाईमा रहेको बसन्तपुर डांडामा गर्मी याममा तराई भन्दा १० डिग्री सेल्सियससम्म कम तापक्रम हुने भएकाले शिलत हुन्छ भने हरियालीयुक्त र स्वच्छ शान्त वातावरणले पर्यटकलाई दिनभर घुम्ने र रमाउने वातावरण बनेको कम्पनीले जनाएको छ ।
