बुटवल । प्रधानमन्त्री तथा मन्त्रिपरिषद कार्यालय अन्तर्गत रहने राष्ट्रिय तथ्याङ्क कार्यालयको जिल्ला आर्थिक गणना कार्यालय रूपन्देही ख बुटवलमा उद्घाटन भएको छ । रूपन्देहीका निमित्त प्रमुख जिल्ला अधिकारी मेघनाथ उपाध्यायले बुटवल देविनगरस्थित वडा कार्यालयको भवनमा स्थापना भएको कार्यालय उद्घाटन गरेका हुन् ।
सो अवसरमा बोल्दै नित्ति प्रमुख जिल्ला अधिकारी उपााध्यायले राष्ट्रलाई चाहिने तथ्यांकहरु मध्ये आर्थिक तथ्यांक अति महत्वपुर्ण हुने भन्दै सही तथ्यांकका आधारमा मात्रै सही नीति र कार्यक्रम बनाउन र प्रभावकारी कार्यान्वयन गर्न सकिने बताए ।
बुटवल वडा नं ११ का वडाध्यक्ष रामचन्द्र खनालले उपमहानगरपालिका र वडाको तर्फबाट कार्यालयलाई आवश्यक पर्ने सहयोग गरिने प्रतिवद्धता जनाए ।
जिल्ला आर्थिक गणना कार्यालय रूपन्देही खका कार्यालय प्रमुख तथ्यांक अधिकृत नन्दलाल कुर्मीले रुपन्देहीमा भैरहवा र बुटवल गरी दुई स्थानमा कार्यालय स्थापना भएको जानकारी गराउंदै बुटवल कार्यालयले बुटवल उपमहानगर तथा देवदह र तिलोत्तमा नगरपालिकामा रहेका व्यवसायिक फर्म तथा प्रतिष्ठानहरुको तथ्यांक संकलन गर्ने बताए ।
बुटवल कार्यालयमा ७५ जना गणक र १२ जना सुपरिवेक्षक तथा भैरहवा कार्यालयमा ८४ जना गणक र १२ जना सुपरिवेक्षक फिल्डमा खटिने कुर्मीले जानकारी दिए ।
