भैरहवा । भाटभटेनी सुपर मार्केट भैरहवाका ग्राहक तथा सञ्चालक, शेयर सदस्य र कर्मचारीहरुले लुम्बिनी केबलकारको टिकटमा २० प्रतिशत छुट पाउने भएका छन् ।
भाटभटेनीको भैरहवा शाखा र लुम्बिनी केबलकार लि बीच मंगलबार छुट सम्बन्धी सम्झौता भएको हो । सम्झौता अनुसार भाटभटेनी भैरहवामा एक हजार रुपैयां बराबरको सामान खरिद गर्ने ग्राहकले एउटा कुपन पाउने छन् । उक्त कुपन २ महिनाभित्र लिएर आउने ग्राहकले लुम्बिनी केबलकारको ७५० रुपैयांको टिकट दरमा २० प्रतिशत छुट पाउने छन् ।
सम्झौतापत्रमा लुम्बिनी केबलकारका तर्फबाट स्टेशन म्यानेजर डिएन कायस्थ सैंजू र भाटभटेनी भैरहवाका शाखा प्रबन्धक कुमार मैनालीले हस्ताक्षर गरेका छन् ।
एक हजारको सामान खरिदमा एउटा कुपन पाए अनुसार ग्राहकहरुले दुई हजारको सामान किन्दा दुई वटा र एवं रितले खरिद अनुसार छुट कुपनहरु पाउने केबलकारका व्यवस्थापक प्रज्ज्वल घिमिरेले बताए ।
यस्तै भाटभटेनीका सञ्चालक, शेयर सदस्य र कर्मचारीहरुले पनि केबलकारकोटिकट दरमा २० प्रतिशत छुट पाउने छन् ।
केबलकारका स्टेशन म्यानेजर कायस्थले बजार प्रवद्र्धनका लागि संस्थाले विभिन्न व्यवसायिक,शैक्षिक र अन्य संघसंस्थासंग सम्झौता गरेर छुट सुविधा दिने गरेको बताए ।
भाटभटेनी भैरहवाका शाखा प्रबन्धक कुमार मैनालीले लुम्बिनी प्रदेशकै पहिलो र नेपालको दोस्रो लामो लुम्बिनी केबलकारसंगको सम्झौताले भाटभटेनीका ग्राहकहरु लाभान्वित हुने बताए ।
आईएमई ग्रुपको नेतृत्वमा स्थानीय समेतको गरी डेढ अर्ब लगानीमा सञ्चालित केवलकारमा साढे दुई वर्ष बढी अवधिमा करिब पांच लाख पर्यटक भित्रिएको कम्पनीका लेखा प्रमुख राजन लम्सालले बताए । केबलकारमा आन्तरिक संगै भारत उत्तर प्रदेशका विभिन्न शहरबाट आउनेको संख्या उल्लेख्य रहेको छ ।
केवलकारको माथिल्लो स्टेशनमा प्रख्यात शक्तिपीठ कामाख्यादेवी मन्दिर र सय वर्षदेखि पुजाआजा हुँदै आएको दुर्गा मन्दिर,जीपलाइन, स्काई साइक्लिङ, ज्वायन्ट स्वीङ, बाल उद्यान, भ्यू प्वाइन्ट, रेष्टुंरा, सेमिनार हललगायत धार्मिक र पर्यटकीय संरचना बनेकाले पर्यटकलाई दिनभर घुम्ने र रमाउने वातावरण बनेको छ ।
केवलकारले जन्मदिनमा निःशुल्क यात्रा, हरेक महिनाको १ गते साँझ महाआरती अफर, ५० जनाभन्दा बढी समूहमा आउनेलाई विशेष छुट अफर लगायत विभिन्न संघसंस्थासँग टिकट दरमा छुटको सम्झौता गरी बजार प्रवर्धन गरिरहेको छ ।
