गुल्मी । गुल्मीको चौरासी फाँट नजिकैको अर्को फाँटमा बर्षऔं पछि ईतिहासिको झल्को दिने गरी आईतवार खेत रोपाई भएको छ ।
लौतो बा लौतो ... असारे गीत र पञ्चेबाजा सहित धुर्कोट गाउँपालिका ६ सिस्तुङ्गका मेघनाथ अर्यालले आयोजना गरेको खेत रोपाइँमा १३० जना रोपारे महिला थिए भने दर्जन बढी बढी ठिगारे र बाउसे थिए ।
झन्डै एक हजार मुरी धान फल्ने खेतमा खेत रोपाई जिल्ला मै अहिले सम्मको ठुलो सहभागिता रहेको र यसले ऐतिहासिक झल्को दिएको धुर्कोट गाउँपालिका अध्यक्ष भूपाल पोखरेलले बताए ।
खेत रोपाइँमा काम गर्नेको भन्दा बढी सङ्ख्या कलाकार द्वय हरि खत्री र शकुन्तला गैरेको प्रस्तुति हेर्नेहरूको थियो ।
कलाकारद्धयः खत्री र गैरेले गाएको प्युली पलाई छ नरौन निरमया सुख कलाई छ भन्ने पुरानो गीत भाकाले सहभागीको बढी मन जितेको थियो ।
त्यस माथि इस्मा मैदानका पञ्चेबाजामा राती अबेर सम्म गाउँपालिका अध्यक्ष सहितका मानिसहरू झुमेका देखिन्थ्यो ।
३० वर्ष सम्म बुटवलमा बसेर गाउँमा कृषि उद्यम गर्न फर्किएका अर्यालले बुटवल सहरमा भन्दा आधुनिक र सुविधा सम्पन्न पक्की घर बनाएका छन् । उनले करोडौंको लगानी गरेर भैसी पालन गरेका छन् ।
सँगै अरूका बाझिएका खेत समेत भाडामा लिएर मकै , गहुँ र धान सयौँ मुरी उत्पादन गर्दै आएका छन्।
भेटनरी अस्पताल तथा पशु सेवा विज्ञ केन्द्र गुल्मीका प्रमुख हुमाकान्त पाण्डेले अर्याल आमा युवाका प्रेरणाका श्रोत उदाहरणीय कृषक भएको बताए।
