फोहरमैला व्यवस्थापनमा समस्या झेलिरहेको सिद्धार्थनगर नगरपालिकाले अब वर्गीकरण गरेको फोहरमात्रै उठाउने निर्णय गरेर सकारात्मक पहलकदमी लिएको छ । कुहिने र नकुहिने फोहरको वर्गीकरण घरमै नागरिकले गर्न आग्रह गर्दै फोहरमैला व्यवस्थापनको पहलकदमीले फोहरमैला व्यवस्थापनमा सहज हुनसक्छ ।
कुहिने र नकुहिने फोहर एकैपल्ट उठाउँदा फोहर व्यवस्थापनमा समस्या भएपछि कुहिने र नकुहिने फोहरको वर्गीकरण गर्न बाध्य भएको नगरपालिकाका अधिकारीहरुको भनाइ छ । यो निर्णय प्रभावकारी कार्यान्वयन हुन सके फोहर व्यवस्थापन सहज हुन्छ । कुहिने फोहरबाट मल बनाउन सकिन्छ, नकुहिने प्लाष्टिकजन्य फोहरलाई रिसाइक्लीन उद्योगलाई बेच्न सकिन्छ । लामो समयदेखि नगरको फोहरमैला डण्डा नदी किनारमा फाल्दै आएको नगरपालिकाले फोहरमैला व्यवस्थापन गर्ने नयाँ ठाउँ पाउन सकेको छैन । नदीमा फोहर फालेर लापरबाही गरिरहेको आरोप खेपेको नगरपालिकालाई फोहरमैला व्यवस्थापन गर्ने ठाउँको अभाव छ । सिद्धार्थनगर नगरपलिकाले अहिले बेलहिया–बुटवल सडक खण्डको नजिकै फोहर फाल्दा सडक यात्रुलाई समेत सास्ती भएको छ । पहिले डण्डा किनारमै सडक क्षेत्रभन्दा केही दुरीमा फाल्दै आएको फोहर अहिले सडक नजिकै फाल्नुको बाध्यता हो, पहिले फोहर फाल्ने ठाउँ बस्ती नजिकै थियो । आसपासको बस्तीले विरोध गरेपछि सडक नजिकै विकल्प खोजेको नगरपालिकासामु अब फोहरमैलाको दिगो व्यवस्थापन गर्न दबाब बढेको छ । वर्गीकरण गरेपछि अहिले भन्दा फोहरमैला व्यवस्थापन सहज हुन्छ । तर वैकल्पिक ठाउँ अनिवार्य खोज्नुपर्छ ।
फोहर वर्गीकरण गरेको मात्रै उठाउने निर्णय गरेको नगरपालिकालाई अब नागरिकले सघाउनुपर्छ । नागरिकको सहयोग विना नगरपालिकाको निर्णय कार्यान्वयन हुन सम्भव छैन । यो निर्णय कार्यान्वयन नगरवासीकै लागि हो । नगरपालिकाको फोहर उठ्नै सकेन भने पर्यटकीय नगरको प्रतिष्ठा नै धुमिल हुन्छ ।
फोहरमैला व्यवस्थापनका लागि रुपन्देहीका पालिका मिलेर एकीकृत योजना कार्यान्वयन गर्न सक्छन् । फोहरमैला प्रशोधन केन्द्र बनाउन कुनै पालिकाको एकल प्रयासबाट सम्भव छैन, दुई वा धेरै पालिका मिलेर बढ्दा फोहरमैला व्यवस्थापन राम्रो हुन्छ । सम्भव हुने पालिका मिलेर फोहरमैला प्रशोधन केन्द्र निर्माण गर्न छलफल गरौँ, निष्कर्ष निकालौँ । अब ढिलाइ नगरौँ ।
