बुटवल । बुटवल ११, देविनगरमा चैत १ गतेदेखि सञ्चालित महामेलामा राष्ट्रियस्तरमा लोकप्रिय कलाकारहरुको आगमनले महामेलाको रौनक बढाएको छ ।
महामेलामा विशेषगरी सांझपख दर्शक तथा उपभोक्ताहरु आफूलाई आवश्यक सामान किनमेल र सांकृतिक कार्यक्रममा आफूलाई मनपर्ने राष्ट्रिय तथा स्थानीय कलाकारको प्रस्तुतिमा रमाउन पुग्ने गरेका छन् ।
दिनभर जस्तो सुनसान हुने महामेला साझ ४ बजेपछी लोकप्रिय कलाकारहरुको प्रस्तुति शुरु संगै चहलपहल र भीडभाड बढ्ने गरेको आयोजकले बताएका छन् । फरवार्ड मल्टिपर्पोज कम्पनीले महामेला आयोजना गरेको हो । महामेलाको संरक्षक बुटवल उपमहानगरपालिका रहेको छ ।
महामेलामा दिनहुँ फरक फरक राष्ट्रिय तथा स्थानीय कलाकारहरुको प्रस्तुतिले दर्शकलाई आकर्षित गरेको आयोजक संस्थाका अध्यक्ष गोविन्द भुसालले बताए । बिहीबार चर्चित गायिका समिक्षा अधिकारी,बसन्त लम्साल लगायतको कलाकारको प्रस्तुति रहेको थियो ।
आज शुक्रबार चर्चित आधुनिक गायम हेमन्त शर्मा, लोकदोहोरी गायक श्याम राना लगायतको प्रस्तुति रहने सांस्कृतिक संयोजक दीपेन्द्र न्यौपानेले बताए ।
रेष्टुरेन्ट सहित सय बढी स्टल रहेको महामेलामा बाल उद्यान,जल परी, पर्यटकीय स्थलहरुको फोटो, डान्स आइडल, जोडी नृत्य लगायतका विविध सांस्कृतिक कार्यक्रमहरु समावेश छन् ।
