कपिलवस्तुको महाराजगञ्ज बर्गदवामा भड्किएको साम्प्रदायिक झडपलाई नियन्त्रणमा लिएर समाजमा सद्भाव कायम गर्न भएको सर्वपक्षीय प्रयास सकारात्मक छ । सामान्य विषयबाट सुरु भएको झगडा उग्र बन्दा समाजमा सद्भाव बिग्रियो । सद्भाव खल्बलिनु हिन्दु र मुस्लिम समुदायकै कमजोरी नभएर व्यक्तिको उत्तेजनाले उत्पन्न भएको परिणाम हो । बिग्रिएको सद्भाव सपार्न दुवै पक्षका अगुवाको प्रयास प्रशंसनीय छ । स्थानीय प्रशासनको पहलमा राजनैतिक दल, जनप्रतिनिधि, नागरिक समाजका अगुवाहरुको सकारात्मक पहलकदमी र सामूहिकताले नै बिग्रिएको सद्भावको वातावरण सकारात्मक बाटोतिर जाँदैछ ।
महाराजगञ्ज नगरपालिकाको बर्गदवा गाउँमा शनिबार दिउँसो भएको धार्मिक विवादले तनावग्रस्त भएपछि स्थानीय प्रशासनले कफ्यु लगाएको थियो । कप्mर्युपछि पनि प्रदर्शन भएपछि प्रहरीले गोली चलायो । त्यसक्रममा झडप हुँदा प्रहरी र प्रदर्शनकारी गरी २३ जना घाइते भएका छन् । त्यसमध्ये चार जनालाई गोली लागेको छ । प्रहरीले ९ जनालाई नियन्त्रणमा लिएको छ । कफ्र्यु जारी छ ।
जिल्लास्तरीय समन्वय-सद्भाव बैठक बसेर आगामी दिनमा कुनै पनि पक्षबाट हिंसात्मक, उक्साहटपूर्ण गतिविधि र साम्प्रदायिक सद्भाव खलबलिने गतिविधि नगर्ने र हुन नदिने सामूहिक प्रतिबद्धतालाई व्यवहारमा उतार्न आवश्यक छ । जिल्ला प्रशासन कार्यालयद्वारा तौलिहवामा आयोजित बैठकमा घटनाका केही दोषी पक्राउ परेको र अन्यको खोजी कार्य र अनुसन्धान भइरहेकाले दोषीलाई पक्राउ गरी कानुन बमोजिम कडा कारबाही गर्ने, घटनामा घाइते भएकाको उपचारका लागि गृह मन्त्रालय र महाराजगञ्ज नगरपालिकालाई अनुरोध गर्ने पनि निर्णय गरिएको छ । भ्रामक सूचना, घृणाजन्य अभिव्यक्ति र कसैको उक्साहटमा अशान्ति पैदा गर्ने र गैरकानुनी गतिविधि गरेमा स्थानीय प्रशासनले कडा कारबाही गर्ने समेत निर्णय भएको छ ।
यस्ता घटनालाई न्यूनीकरण गर्न सामूहिक प्रतिबद्धता र पहलकदमीको खाँचो छ । बिगार्न कुनै एक व्यक्तिले तत्काल सक्छ । सामाजिक सञ्जालमा उत्तेजित अभिव्यक्ति दिने, अरुलाई लाञ्छना र घृणा फैलाउने गतिविधि सामाजिक सञ्जालमा हुनसक्छन्, तसर्थ सामाजिक सञ्जालको प्रयोगलाई जवाफदेही र मर्यादित बनाउन आवश्यक छ । सामाजिक सञ्जालमा फैलिने उत्तेजना र अराजक गतिविधि छिट्टै टाढाटाढासम्म फैलिने भएकाले समाजमा सद्भाव छिटो भड्किने जोखिम हुन्छ ।
यो बेला स्थानीय तहको अगुवाइमा मेलमिलाप कार्यक्रम चलाउन सकिन्छ । शान्ति र सद्भाव ¥यालीले पनि समाजलाई लयमा हिडाउन सक्छ । साम्प्रदायिक हिंसा हुनुको कारण खोज्ने र त्यस्तो गतिविधि आगामी दिनमा हुन नदिन पहलकदमी लिन सक्दा मात्रै समाजमा सद्भाव कायम हुन सक्छ । त्यस्तो गतिविधि गर्नेको पहिचान र कानुनी कारबाहीले पनि समाजमा अराजकता नियन्त्रणको उपाय हो । कानुनको सही प्रयोगले नै दण्डहिनताको अन्त्य हुन्छ । र, समाज लयमा हिंड्न सक्छ ।
