बुटवल । बुटवल देवीनगरमा जारी महामेलामा दैनिकरुपमा प्रस्तुति दिइरहेका राष्ट्रियस्तरमा ख्यातिप्राप्त कलाकारहरुको लर्कोले महामेलाको रौनक बढाएको छ ।
महामेलामा दैनिकरुपमा ख्यातिप्राप्त राष्ट्रिय तथा स्थानीय कलाकारहरुको सांगीतिक प्रस्तुति रहने गरेको छ ।
विशेषगरी साँझपख संगीतपारखी दर्शकहरुको महामेलामा भीड लाग्ने गरेको आयोजक संस्थाका अध्यक्ष गोविन्द भुसालले बताए । आफूलाई मनपर्ने कलाकारको सांगीतिक प्रस्तुतिमा रमाउन र आवश्यक सामान किनमेल तथा रेष्टुरेण्टमा खानपीनका लागि दर्शकहरु महामेलामा आउने क्रम दिन प्रतिदिन बढ्दो क्रममा रहेको अध्यक्ष भुसालले बताए ।
दिनभर जस्तो सुनसान हुने महामेला साँझ ४ बजेपछि लोकप्रिय कलाकारहरुको प्रस्तुति सुरुसँगै चहलपहल र भीडभाड बढ्ने गरेको सांस्कृतिक संयोजक दीपेन्द्र न्यौपानेले बताए ।
आइतबार लोक दोहोरी गायक खुमन अधिकारी, आधुनिक गायक हेमन्त शर्मा, लोक दोहोरी गायिका लालमाया थापा, गायकहरु शिव क्षेत्री, भुवन खड्कालगायतको प्रस्तुतिले दर्शकलाई भरपूर मनोरञ्जन दिलाएको सांस्कृतिक संयोजक दीपेन्द्र न्यौपानेले बताए । आज सोमबार चर्चित लोकदोहोरी गायक चन्द्र शर्मा, दोहोरी गायिका प्रिति आले, हास्य कलाकार उज्ज्वल गिरी, टप सानेनी डान्स ग्रुपलगायतका कलाकारको गीत र नृत्य रहने छ ।
रेष्टुरेण्टसहित सय बढी स्टल रहेको महामेलामा बाल उद्यान, जल परी, पर्यटकीय स्थलहरुको फोटो, डान्स आइडल, जोडी नृत्यलगायतका विविध सांस्कृतिक कार्यक्रमहरु समावेश छन् ।
चैत २४ सम्म चल्ने महामेला फरवार्ड मल्टिपर्पोज कम्पनीले महामेला आयोजना गरेको हो भने महामेलाको संरक्षक बुटवल उप–महानगरपालिका रहेको छ ।
