बुटवल । बुटवल देवीनगरमा जारी महामेलामा आज सांझ चर्चित कलाकार दुर्गेश थापाले आफ्नो सांगीतिक प्रस्तुति दिने भएका छन् । आज साझ ८ देखि ९ बजेसम्म दुर्गेश थापाको प्रस्तुती रहने महामेलाका सास्कृतिक संयोजक दिपेन्द्र न्यौपानेले बताए । दुर्गेशको प्रस्तुति हेर्न साधारण टिकट १०० रुपैयाँमै सकिने न्यौपानेले बताए । दुर्गेश पहिल्ला वर्षहरुमा सर्वाधिक चर्चित र महंगा कलाकारमा गनिन्छन् ।
दुर्गेश संगै महामेलामा ¥यापर प्रज्वल पौडेल, दोहोरी गायक भरत क्षेत्री र आश्मा बन्जाडेको प्रस्तुति रहनेछ । दुर्गेशको प्रस्तुति रहने भएकाले आज हजारौं दर्शक आउने अनुमान गरिएको महामेलाका संयोजक गोबिन्द भुसालले बताए ।
महामेलामा दैनिकरुपमा ख्यातिप्राप्त राष्ट्रिय तथा स्थानीय कलाकारहरुको सांगीतिक प्रस्तुति रहने गरेको छ ।
विशेषगरी सांझपख संगीतपारखी दर्शकहरुको महामेलामा भीड लाग्ने गरेको आयोजक संस्थाका अध्यक्ष गोविन्द भुसालले बताए । आफूलाई मन पर्ने कलाकारको सांगीतिक प्रस्तुतिमा रमाउन र आवश्यक सामान किनमेल तथा रेष्टुरेन्टमा खानपीनका लागि दर्शकहरु महामेलामा आउने क्रम दिन प्रति दिन बढ्दो क्रममा रहेको अध्यक्ष भुसालले बताए ।
दिनभर जस्तो सुनसान हुने महामेला साझ ४ बजेपछी लोकप्रिय कलाकारहरुको प्रस्तुति शुरु संगै चहलपहल र भीडभाड बढ्ने गरेको सांस्कृतिक संयोजक दीपेन्द्र न्यौपानेले बताए । चैत २४ सम्म चल्ने महामेला फरवार्ड मल्टिपर्पोज कम्पनीले महामेला आयोजना गरेको हो भने महामेलाको संरक्षक बुटवल उपमहानगरपालिका रहेको छ । महामेलाको सहआयोजकमा राष्ट्रिय लोक संचारकर्मी नेपाल केन्द्र र लुम्बिनी प्रदेश समिती रहेको छ ।
रेष्टुरेन्ट सहित सय बढी स्टल रहेको महामेलामा बाल उद्यान,जल परी, पर्यटकीय स्थलहरुको फोटो, डान्स आइडल, जोडी नृत्य लगायतका विविध सांस्कृतिक कार्यक्रमहरु समावेश छन् ।
