बुटवल । मासु व्यवसायी संघ नेपाल रुपन्देहीमा आबद्ध मासु व्यवसायीहरु कुखुरा, खसीबोका, माछापालनलगायतका विभिन्न मासुजन्य क्षेत्रको उत्पादनमा पनि जोडिने भएका छन् । 

संघको हालै सम्पन्न आठौं साधारणसभाबाट निर्वाचित विशाल थापा नेतृत्वको कार्यसमितिले उत्पादनमा जोडिंदा मात्रै व्यवसाय दीगोरुपमा चल्ने र विचौलियाको प्रभावकाट मुक्त हुन सहज हुने निश्कर्ष निकालेर उत्पादन उप–समिति गठन गर्ने निर्णय गरेको हो । अब व्यवसायीहरुलाई खसी-बोका, कुखुरा, माछा, रांगा-पाडा, बंगुर पालनमा पनि संलग्न गराउने मोडालिटी तयार गरेर कार्यान्वयनमा जाने तयारी भएको अध्यक्ष विशाल थापाले बताए । 

‘व्यवसायीहरु आफूलाई आवश्यक कच्चा पदार्थ उत्पादनमा आफैँ जोडिएपछि खसी÷बोका, कुखुरा, माछा, रांगा÷पाडा, बंगुर बिक्रीमा बिचौलियाहरु हावी हुने परिपाटी घट्ने, उत्पादनमाआत्मनिर्भर हुन टेवा पुग्ने जस्ता फाइदा हुने देखेका छौं,’ अध्यक्ष थापाले भने –‘मासु व्यवसायी र उत्पादक किसान एक अर्काका पूरक भएकाले आफूहरु पनि उत्पादन उप–समितिगठन गरेरै उत्पादनमा जोडिएर कृषक पनि बन्न चाहेका हौं ।’ 

 संघका महासचिव थानिश्वर सुवेदीले अधिवेशनपछि बसेको पहिलो बैठकले उत्पादन उप–समितिसंगै खसी÷बोका, कुखुरा, माछा, रांगा÷पाडा, बंगुरको मासु बिक्री गर्ने व्यवसायीका ५ वटा वस्तुगत र पोल्ट्री सप्लायर्सजन्य होलसेल गरी ६ उपसमिति पनि गठन गरिएको बताए । 

यस्तै संघको प्रेस सल्लाहकारमा टिआर शर्मा र कानुनी सल्लाहकारमा दामोदर घिमिरेलाई मनोनित गरिएको महासचिव सुवेदीले जानकारी दिए ।