तानसेन नगरपालिका पाल्पा जिल्लाको सदरमुकाम रहेको नगरपालिका हो । संघीयता आइसकेपछि तानसेन नगरपालिकाभित्र विभिन्न विषयमा प्रशस्त मात्रामा भौतिक पूर्वाधारका क्षेत्रमा विकास भएका छन् । 

 

तानसेन नगरपालिकाभित्र बजार क्षेत्रका वडा नं. १ गैरागाउँ, मिशन अस्पताल क्षेत्र, वडा नं. २ को मेहलधारा, नारायाणस्थान, अशनटोल, वडा नं. ३ को टक्सार, भगवतीटोल, वसन्तपुर क्षेत्र, वडा नं. ४ को मखनटोल, विशालबजार, सिल्खानटोल क्षेत्र, वडा नं. ५ को कैलाशनगर बतासे क्षेत्र, वडा नं. ६ को भिमसेनटोल बसपार्क बर्तुङ क्षेत्र, वडा नं. ७ को काजिपौवा क्षेत्रका मुख्य सडकदेखि भित्री सडकहरु पिच, कालेपत्रे तथा ढलाइ भएका छन् ।

 

तानसेन नगरपालिकाले एक वडा एक किलोमिटर पिच कार्यक्रम सञ्चालन गरी  १४ वटा वडाहरूमध्ये २, ३, ४ बाहेक ११ वटा वडाहरूमा पिचको काम गरेको छ । एक वडा एक किलोमिटर सडक कालोपत्रेले नगर ग्रामीण वडाहरुका पनि नगरपालिकाको महशुस गराएको छ ।  पछिल्लो समय नगरपालिकाभित्र गुफाचौर, डुम्रे, सुनडाँडा र तेल्घा सडक खण्डमा गरी करिब १० किलोमिटर सडक कालोपत्रे भएको तानसेन नगरपालिकानगर प्रमुख सन्तोषलाल श्रेष्ठले बताए ।

 

विश्व बैंकको सहयोगमा संघीय सरकारमार्फत् प्राप्त अनुदानमा डुम्रे, सुनडाँडा, तेल्घा गुफाचौर, बडहरे र हुलाङ्दी सडकअन्तर्गत ६.७० किलोमिटर सडक निर्माण सम्पन्न भएको छ । अवस्थाअनुसार आरसीसी ढलान, कभर्ट पुल, कजवेहरु निर्माण भएका छन् । तानसेन नगरपालिकाभित्रका धेरै सडकहरूको सुधार तथा स्तरउन्नतिका कामहरु भएका छन् । 

 

तानसेन  नगरपालिकाको टँुडिखेल क्षेत्रमा  रहेको  प्रमुख प्रशासकीय भवनलाई स्तरउन्नति गरी तला थप्ने, ट्रस निर्माण, योजना तथा प्राविधिकहरुको लागि छुट्टै भवन निर्माण गरी कार्य सञ्चालन भएको छ । वडा नं. १, २, ३, ४, ५, ९, ११ र १२ का वडा कार्यालय भवनहरू निर्माण भई सेवा सञ्चालनमा रहेका छन् ।  वडा नं. ९ दमकडामा वडा कार्यालय निर्माणाधीन अवस्थामा रहेको छ । वडा नं. ७ मा रहेको शीतभण्डार  २०६४ सालदेखि निर्माणाधीन रहेकोमा हाल अन्तिम चरणमा पुगेको छ । वडा नं. ५ वनदेवी क्षेत्रमा आधुनिक सेवा सुविधासहितको नयाँ हरित बसपार्क निर्माणाधीन रहेको छ । यो बसपार्क  यसै आर्थिक वर्षमा सम्पन्न हुने गरी विभिन्न पूर्वाधारका कामहरु भइरहेको नगर उप–प्रमुख प्रतिक्षा गाहा सिंजालीले बताइन् । 

 

तानसेन नगरपालिको आगनको रुपमा रहेको महत्वपूर्ण स्थान टँुडिखेल मैदानलाई स्तरउन्नति भएको छ । टँुडिखेलको वरिपरि नियमित रुपमा घुमफिरको लागि सडक निर्माण गरिएको छ । टँुडिखेलको पश्चिमतर्फ विभिन्न किसिमका कार्यक्रमहरुको लागि मञ्च निर्माण भएको छ । खेल खेल्नको लागि टँुडिखेलभित्र बरमुण्डा दुवो रोपण गरिएको छ । उत्तर पश्चिम क्षेत्रमा विभिन्न किसिमका प्रतिक्षालयहरु निर्माण भएका छन् ।  वडा नं. ६ को बाघ खोरमा खेल मैदानको डीपीआर तयार गरी पहिलो चरणको काम भएको छ । ग्रामीण क्षेत्रका अन्य वडामा वडास्तरीय खेलमैदानहरु निर्माण भएका छन् । 

 

तानसेन पहाडी शहर भएकोले खुला ढललाइलाई व्यवस्थित गरिएको छ । परम्परागत खोल्साखोल्सीबाट बग्दै आएका ढलहरूलाई आरसीसी ढलान गरी व्यवस्थित गरिएको छ ।  नारायणस्थानदेखि तिनधाराको परम्परागत ढल, हुलाङ्दीदेखि बागबानीको परम्परागत ढल र वडा नं. ४ को पोडे खोल्साको ढललाई व्यवस्थित आरसीसी ढलान गरी सुरक्षित प्रदूषणमुक्त बनाइएको तानसेन नगरका प्रमुख प्रशासकीय अधिकृत चेतनाथ गिरीले बताए । वसन्तपुर क्षेत्र, मिसन क्षेत्र, बारुदखान क्षेत्रमा व्यवस्थित ढलान निर्माण भएका छन्  । 

 

तानसेन नगरपालिकाभित्रका अधिकांश विद्यालयहरु आरसीसी भवनमा कक्षाकोठा सञ्चालनमा रहेका छन् । विद्यालयको मागअनुसार आवश्यकताको आधारमा कक्षाकोठा थप्न पालिकाले रकम विनियोजन गर्दै आएको छ । 

 

तानसेन नगरपालिकाले बजार क्षेत्रका वडा नं. ६ मा भवन निर्माण गरी सामुदायिक स्वास्थ्य केन्द्र सञ्चालनमा ल्याएको छ । वडा नं. ८, ९, १०, ११, १२, १३ र १४ मा पुनः समायोजन भएका वडाहरु भएकोले उक्त वडामा स्वास्थ्यचौकी भवनहरु निर्माण गरी स्वास्थ्य सेवा सञ्चालनमा आएका छन् । 

 

अर्गली, छेरलुङ, माडी फाँट, प्रभास, बाँसटारी क्षेत्रमा सिँचाइको लागि पक्की कुलो निर्माण भएका छन् । उपभोक्त समितिमार्फत् खानेपानीका ट्याङ्कीहरु निर्माण भएका छन् । वडा नं. ७ को कुनसेरेमा औद्योगिक ग्रामको डीपीआर तयार भइ पहिलो चरणको काम सकिएको छ  । थप कामको लागि थप बजेट  संघीय मन्त्रालयमा माग गरिएको छ ।