बुटवल । तिलोत्तमा नगरपालिकाको ड्राइभरटोलमा आयोजित खुल्ला बी लेभल भलिबल प्रतियोगिताको उपाधि आयोजक ड्राइभरटोल भलिबल क्लबले जितेको छ । ड्राइभरटोल भलिबल क्लबले आयोजना गरेको पहिलो संस्करणको प्रतियोगितामा तिलोत्तमा ८ भलिबल क्लबलाई फाइनलमा पराजित गर्दै आयोजक नीलो टिमले उपाधि जितेको हो ।
प्रतियोगितामा तिलोत्तमा ८ टिम उपविजेता, मणिमुकुन्द भलिबल क्लब तेस्रो र आयोजक ड्राइभरटोल भलिबल क्लब सेतो सान्त्वना भएका छन् । विभिन्न जिल्लाका २६ टिमको सहभागिता रहेको प्रतियोगिताको विजेताले ३० हजार ५५५, उपविजेताले २० हजार ५५५, तेस्रोले १ हजार ५५५ नगद पुरस्कार प्राप्त गरेका आयोजक क्लबका अध्यक्ष देव रानाले जानकारी दिए । यस्तै विभिन्न विधाका उत्कृष्ट खेलाडीलाई पनि पुरस्कृत गरिएको थियो ।
प्रतियोगिता सम्पन्न गर्न क्लबका सल्लाहकार एवं समाजसेवी ड्राइभरटोल निवासी लक्ष्मण मल्लले खेल मैदान निशुल्करुपमा उपलब्ध गराउनुका साथै अन्य व्यवस्थापन पक्षमा समेत सहयोग गरेका थिए ।
प्रतियोगिता समापनका अवसरमा मल्ल लगायतलाई आयोजकले सम्मान गरेका थिए । आगामी वर्षमा प्रतियोगितालाई थप व्यवस्थित बनाइने अध्यक्ष देव रानाले बताए ।
