पाल्पा
नेपाली सेनाको आयोजनामा सुरु भएको ‘चौथो ऐतिहासिक गोरखा–जितगढी पदयात्रा’ टोली बुधबार पाल्पा प्रवेश गरेको छ ।
ऐतिहासिक गढी, किल्ला र दरबारहरूको संरक्षण, सम्वद्र्धन तथा नेपालको गौरवशाली इतिहासबारे नागरिकलाई सुसूचित गर्ने उद्देश्यले गत चैत २७ गते गोरखाबाट सुरु भएको यो पदयात्रा बुधबार बिहान पाल्पा प्रवेश गरेको हो । गोरखा, तनहुँ र स्याङ्जा हुँदै आएको सैनिक टोलीले स्याङ्जा र पाल्पाको सिमानास्थित ऐतिहासिक केलादीघाटमा पाल्पामा तैनाथ फौजलाई राष्ट्रिय झण्डा र बलेको दियो (टर्च) हस्तान्तरण गरेको छ ।
पाल्पाको रामपुर केलादीघाटमा तनहुँबाट आएको नेपाली सेनाको पदयात्रा टोलीले रामपुर नगरपालिकाका नगरप्रमुख रमणबहादुर थापालाई राष्ट्रिय झण्डा हस्तान्तरण गरी पाल्पामा यात्रा सुरु गरेको हो । पदयात्राको क्रममा २ नम्बर राज दल गणका प्रमुख सेनानी अनुप थापाले २२ नम्बर बाहिनीका बाहिनीपति विमलराज शर्मालाई एकताको प्रतीकका रूपमा बलेको दियो हस्तान्तरण गरे ।
पदयात्रा टोलीलाई पाल्पाको दि फेमस महिन्द्र दल गणले पञ्चेबाजा र राष्ट्रिय धुनका साथ स्वागत गरेको थियो । पदयात्रामा सेनाका अधिकृतसहित ५३ जनाको टोली, जनप्रतिनिधि, विद्यार्थी, नागरिक समाज र सञ्चारकर्मीहरूको उत्साहजनक सहभागिता रहेको छ ।
पदयात्रामा सहभागी टोलीलाई स्वागत गर्दै प्रतिनिधिसभा सदस्य सन्दिप रानाले यस अभियानले सैनिक–नागरिक सम्बन्धलाई थप प्रगाढ बनाउने र पुर्खाले रक्षा गरेका ऐतिहासिक सम्पदाहरूको प्रचार–प्रसारमा टेवा पुग्ने बताए । नेपाली सेनाको पदयात्रा टोलीलाई स्वागत गर्दै पाल्पाकी प्रमुख जिल्ला अधिकारी बिनु बज्राचार्य कुँवरले एकीकरणका बेला प्रयोग भएका मार्गहरूको पहिचान र संरक्षणमा यो यात्रा महत्वपूर्ण रहेको बताइन् ।
यो पदयात्रा आगामी बैशाख ७ गते बुटवलको ऐतिहासिक जितगढी किल्ला पुगेर टुङ्गिनेछ । वि.सं. १८७२ बैशाख ७ गतेका दिन तत्कालिन पाल्पाका कर्णेल उजिरसिंह थापाको नेतृत्वमा रहेको नेपाली फौजले आधुनिक हतियारले सुसज्जित अंग्रेज सेनालाई पराजित गरेको थियो ।
नेपाली सेनाको वीरताको प्रतीक मानिने सोही दिनको स्मरणमा बुटवल उप–महानगरपालिका र नेपाली सेनाले संयुक्त रूपमा प्रत्येक वर्ष जितगढीमा ‘विजयोत्सव’ मनाउँदै आएका छन् । यस पदयात्राले नयाँ पुस्तालाई नेपालको स्वाभिमान र वीर पुर्खाको योगदानको झल्को दिने लक्ष्य राखेको छ ।
पदयात्रा टोलीलाई पाल्पाका ७ वटा स्थानीय सरकार रामपुर नगरपालिका, निस्दी गाउँपालिका, पुर्वखोला गाउँपालिका, रम्भा गाउँपालिका, माथागढी गाउँपालिका, तानसेन नगरपालिका र तिनाउ गाउँपालिकाले सहयोग र समन्वय गर्ने छन् ।
