बुटवल । बुटवल उपमहानगरपालिकाले फोहोर व्यवस्थापनलाई आधुनिक र दिगो बनाउने उद्देश्यसहित वडा नं. ७ र ८ मा घरदैलो अभियान सुरु गरेको छ । संयुक्त राष्ट्र विकास कार्यक्रम (युएनडिपि) नेपालको सहयोग तथा फोहोर सरसफाइ सहकारी संस्थाको आयोजनामा सुरु गरिएको अभियानमार्फत घरमै तीन तहमा फोहोर छुट्याउने अभ्यासलाई प्रोत्साहन गरिएको हो ।
अभियानअन्तर्गत कुहिने, नकुहिने र पुनः प्रयोग गर्न सकिने फोहोर छुट्याएर व्यवस्थापन गर्ने विषयमा घरघरमा पुगेर जनचेतना फैलाइँदैछ । कार्यक्रममा प्लास्टिकका झोला गल्न करिब ३० वर्ष, पानीको बोतल गल्न ५०० वर्ष तथा सेनेटरी प्याड गल्न ६०० वर्षसम्म लाग्ने भएकाले फोहोरको सही व्यवस्थापन अपरिहार्य रहेको जानकारी दिइएको थियो ।
बुटवल–७ मा रहेको फोहोर प्रशोधन केन्द्रमा जैविक फोहोरबाट मल उत्पादन गर्ने तथा प्लास्टिकजन्य फोहोरबाट इँटा उत्पादन गर्ने प्रविधि सञ्चालनमा रहेको बुटवल सरसफाइ तथा वातावरण संरक्षण सहकारी संस्थाका अध्यक्ष बिष्णु कार्कीले बताउनुभयाे ।
कार्यक्रममा बुटवल उपमहानगरपालिकाका नगर उप प्रमुख सबित्रादेबी अर्यालले फोहोर व्यवस्थापन केवल सरसफाइको विषय मात्र नभई वातावरण संरक्षण, स्वास्थ्य सुरक्षा र आर्थिक उत्पादनसँग जोडिएको विषय भएको बताउनुभयो । उहाँले घरबाटै फोहोर छुट्याउने बानी विकास गर्न सके फोहोरलाई स्रोतमा रूपान्तरण गर्न सकिने उल्लेख गर्नुभयो ।
युएनडिपिका लुम्बिनी तथा गण्डकी प्रदेश प्रमुख सुदिप अर्यालले बुटवललाई सफा, हरित र व्यवस्थित सहर बनाउने अभियानमा नागरिकको सहभागिता सबैभन्दा महत्वपूर्ण रहने समेत बताउनुभयो । उहाँले फाेहाेर बर्गिकरणमा ध्यान दिन आग्रह गर्नुभयाे ।
साे अवसरमा टाेलबिकास संस्थाहरुबाट प्रतिनिधित्वमुलक सहभागिता रहेकाे थियाे भने सहभागीहरुलाइ फाेहाेरकाे बर्गिकरणकाे नमुना समेत प्रस्तुत गरिएकाे थियाे ।
