संघीय सरकारमा राष्ट्रिय स्वतन्त्र पार्टीले झण्डै दुई तिहाई नजिकको बहुमत ल्याएको छ । रास्वपाको झण्डै दुई तिहाई बहुमतले राजनैतिक स्थिरताको प्रष्ट संकेत देखिएको छ । संघीय सरकारमा राजनैतिक स्थिरताको प्रष्ट तस्विर देखिंदा प्रदेश सरकारमा फेरबदलको हलचल देखिन थालेको छ ।
केही दिनअघि एमाले अध्यक्ष केपी ओलीले एमाले नेताहरुसँग कोशी प्रदेश र सुदुरपश्चिम प्रदेश सरकारमा कांग्रेस सहमतिअनुसार नचलेको भन्दै नेतृत्व परिवर्तनको संकेत गरेको भन्दै केही सञ्चार माध्यममा समाचार आएका थिए । यद्यपी कांग्रेस सभापति गगन थापाले कांग्रेस–एमाले सहकार्य अहिले आवश्यक रहेको बताएका छन् । सुदुर पश्चिम प्रदेशमा एमाले–कांग्रेसबिच सहकार्य विना सरकार बन्नै नसक्ने अवस्था रहेको थापाले प्रष्ट पारे । मधेस प्रदेशमा जनमत पार्टीले समर्थन फिर्ता लिएपछि सरकार परिवर्तनको सम्भावना रहे पनि नेतृत्वको सरकारलाई निरन्तरता दिने चार दलबिच सहमतिले तत्काललाई टरेको छ । जनमत पार्टीले समर्थन फिर्ता गरेपछि कांग्रेस, जसपा नेपाल, नेपाली कम्युनिस्ट पार्टी (नेकपा) र लोसपा नेपालको संयुक्त बैठकले सरकारलाई निरन्तरता दिने निर्णय ग¥यो ।
प्रदेश सरकारहरु धेरै अस्थिर भए । प्रदेशमा कुनै राजनैतिक दलको प्रष्ट बहुमत नआउँदा दुई वा दुईभन्दा बढी दल मिलेर सरकार बनाउनुपर्ने बाध्यता छ । यो बाध्यताले गर्दा दलहरुबिच छिटो छिटो गठबन्धन फेर्ने प्रवृत्ति बढेको छ । जसले आम नागरिकमा प्रदेश सरकारप्रति वितृष्णा बढेको छ । खासगरी सरकार फेरिएपछि मन्त्रालयको संख्या बढाउने, मन्त्रालयको नाम हेरफेर गर्ने र बजेट विनियोजना मनपरी गर्ने प्रवृत्ति पछिल्ला वर्ष धेरै बढेको छ । बरु प्रदेश सरकारको पहिलो कार्यकालमा केही आशा लाग्दा काम भए । संस्थागत संरचनाको अभाव हुँदा समेत बजेट विनियोजन र खर्चमा सन्तुलन र अनुशासनमा रहेको देखिन्छ ।
अहिले सरकार हेरफेरको समय होइन् । राष्ट्रिय स्वतन्त्र पार्टीलाई जनादेश गएकाले कांग्रेस, एमाले र माओवादीसहितका दल आत्मसमीक्षा र आत्ममूल्याङ्कनमा लाग्नुपर्छ । अहिले प्रदेश सरकारहरु हेरफेर गर्दा कुनै दललाई फाइदा हुन्न । कुनै राजनैतिक सन्देश पनि जाँदैन ।
त्यसो हुँदा दलहरुले प्रदेश सरकारमा नेतृत्व हेरफेर गर्ने तथा गठबन्धन फेर्ने दाउपेचमा लागेर प्रदेश संरचनाप्रति नागरिकमा बढ्दै गएको वितृष्णालाई बढाउन हुन्न । प्रदेश संरचनाप्रति जनविश्वास बढाउन जरुरी छ । यो संरचनाप्रति वितृष्णा बढाएर हटाउने वातावरण बने द्वन्द्व श्रृजना हुन्छ । अहिले मधेस प्रदेश बाहेक ६ वटा प्रदेशमा कांग्रेस–एमालेबिच सत्ता सहकार्य छ । यो सहकार्य हेरफेर गर्ने दाउपेचमा होइन्, बरु प्रदेशमा रहेको नेतृत्वलाई नतिजामुखी काम गर्न प्रेरित गर्न आवश्यक छ ।
