बुटवल । त्रिभुवन अन्तराष्ट्रिय विमानस्थलमा सौर्य एयरलाइन्सको विमान दुर्घटनाले विमानस्थल बन्द छ । यसले यो बिमानस्थलबाट हुने उडान अवतरण प्रभावित भएका छन् । काठमाण्डौ अवतरण गर्न नसक्ने अवस्था आएपछि भैरहवामा रहेको गौतमबुद्ध अन्तराष्ट्रिय विमानस्थल तर्फ डाइभर्ट भएका छन् ।
विमानस्थल बन्द भएको कारण भैरहवा देखि काठमाण्डौँ र धनगढी देखि काठमाण्डौँ आन्तिरक उडान भरेको श्री एयरलाइन्सको दुईवटा विमान भैरहवामा अवतरण भएको गौतमबुद्ध अन्तराष्ट्रिय विमानस्थलका सूचना अधिकारी विनोदसिंह राउतले जानकारी दिए ।
गौतमबुद्ध अन्तराष्ट्रिय विमानस्थलमा अन्तराष्ट्रिय बिमानस्थल खुल्ला अवस्थामा रहेकोले आवश्यकता अनुसार अन्तराष्ट्रिय बिमानको लागि अवतरण अनुमति दिन तयार रहेको उनले बताए ।
‘त्रिभुवन विमानस्थलमा विमान दुर्घटना भएका कारण अवतरण गर्न नपाएका विमानहरु गौतमबुद्ध विमानस्थलतर्फ डाइभर्ट भई अवतरण भएका छन’ उनले भने, ‘गौतमबुद्ध अन्तराष्ट्रिय विमानस्थल खुल्ला छ र आवश्यक परे हामी अन्तराष्ट्रिय विमानहरु पनि अवतरणका लागि अनुमति दिने तयारी अवस्थामा छौँ ।
त्रिभुवन विमानस्थल बन्द हुदाँ उडान अवतरण प्रभावित भएका छ । अवतरण गर्न लागेको केही अन्तराष्ट्रिय विमानहरु भारतीय आकाशमा ‘होल्ड’ भएका छन् ।
