बुटवल । न्यू होराइजन स्पोर्ट्स क्लबले नवौं राष्ट्रिय भलिबल दिवस मनाएको छ ।
न्यू होराइजन अंग्रेजी आवासीय माविको आफ्नै भलिबल खेल मैदानमा एक औपचारिक कार्यक्रम गरी भलिबल दिवस मनाइएको हो ।
सो अवसरमा क्लबले क्लबका संरक्षक एवं विद्यालयका निवर्तमान प्राचार्य लोकनाथ उपाध्याय र निवर्तमान उपप्राचार्य बालकृष्ण भण्डारीलाई क्लब र विद्यालयलाई गरेको योगदानप्रति आभार र कृतज्ञता सहित सम्मान गरेको छ ।
यस्तै क्लबका सल्लाहकार एवं नव नियुक्त प्राचार्य बासुदेव अर्याल र क्लबका कानूनी सल्लाहकार एवं नवनियुक्त उपप्राचार्य राजेश पाण्डेलाई बधाई तथा सफल कार्यकालको शुभकामना सहित सम्मानन गरेको छ ।क्लबका अध्यक्ष चेतन उचै ठकुरी, उपाध्यक्ष बालकृष्ण बस्याल, सदस्य मिलन राना लगायतले चारै जनालाई दोसल्ला ओडाएर कदर पत्र सहित सम्मान गरिएको हो ।
सो अवसरमा बोल्दै निवर्तमान प्राचार्य लोकनाथ उपाध्यायले न्यू होराइजन स्पोर्टस् क्लबका कारण विद्यालयले धेरै खेल प्रतियोगिताहरु निरन्तर जित्दै विद्यालयको गरिमा र प्रतिष्ठा उचाईमा पु¥याउन ठूलो भूमिका खेलेको बताए । उनले खेलाडीहरु खेललाई मात्र नभई अध्ययनलाई पनि बराबर महत्व दिन सुझाव दिंदै खेल र अध्ययनमा सफल हुन अनुशासन मुख्य कुरा हुनेमा जोड दिए ।
आफू न्यू होराइजन संस्था र स्पोर्टस् क्लबबाट कहिल्यै टाढा नहुने र प्रत्यक्ष अप्रत्यक्षरुपमा बाहिर रहेर पनि सल्लाह सुझाव र योगदान निरन्तर गरिरहने प्रतिवद्धता जनाउंदै उपाध्यायले स्पोर्टस् क्लबको आजीवन सदस्यता लिने घोषणा गरे ।
प्राचार्य वासुदेव अर्यालले क्लबले धेरै रचनात्मक काम हरु गर्दै आएको भन्दै यसलाई निरन्तरता दिन आग्रह गर्दै विद्यालय र व्यक्तिगत हिसाबले पनि सहयोग जारी रहने प्रतिवद्धता जनाए ।
निवर्तमान उपप्राचार्य बालकृष्ण भण्डारीले देशलाई चिनाउने खेल भलिबल भएको चर्चा गर्दै यसको विकासका लागि विद्यालय तहबाटै खेलाडी उत्पादन गर्न जरुरी रहेकोमा जोड दिए ।
