बुटवल । नेपाली कला, संस्कृति र आधुनिक फेसनको आकर्षक संगमका रूपमा द हिमांशुज डिजाइनर रनवे सिजन–६ बुटवलमा सम्पन्न भएको छ ।
हिमांशु बुटिक एण्ड ट्रेनिङ सेन्टरले हायात होटलमा गरेको भब्य कार्यक्रममा नेपाली मौलिक पहिचान, सिर्जनात्मक फेसन र युवा डिजाइनरहरूको प्रतिभा एकै मञ्चमा देखिएको थियो ।
कार्यक्रमको ‘कल्चर राउन्ड’ विशेष आकर्षण बनेको थियो । नेपालका विभिन्न जातजातिको पहिचान झल्किने मौलिक पोशाकमा मोडेलहरू र्याम्पमा उत्रिएका थिए । मगर, गुरुङ, थारु, नेवारीदेखि विभिन्न जाती र समुदायका सांस्कृतिक पहिरनले नेपाली समाजको परम्परा, रितिरिवाज र बहुसांस्कृतिक विविधतालाई जीवन्त रूपमा प्रस्तुत गरेको थियो ।
पुरानो संस्कृतिमा आधुनिक डिजाइनको समिश्रण गरेर तयार गरिएका पहिरनले दर्शकलाई विशेष आकर्षित गरेका थिए ।
कार्यक्रममा १२ जना डिजाइनरले आफूले तयार पारेका नयाँ तथा सिर्जनात्मक फेसन प्रस्तुत गरेका थिए । उनीहरूले विभिन्न चरणमा पुरुष र महिला मोडेलमार्फत आफ्ना डिजाइन प्रदर्शन गरेका थिए ।
कल्चर राउण्ड, ‘ब्राइडल राउन्ड’, ‘पार्टी वेयर’ र ‘बेबी राउण्ड’ लगायतका थिममा तयार पारिएका पहिरनले नेपाली फेसन क्षेत्रमा नयाँ सम्भावनाको संकेत गरेका थिए ।
फेसन पारखी दर्शकहरू मोडेलले प्रस्तुत गरेका आकर्षक डिजाइनको फोटो र भिडियो लिन व्यस्त देखिन्थे ।
कार्यक्रममा सहभागी महिला अगुवा भगवती पाण्डेले बुटवलमा यो स्तरको फेसन डिजाइन प्रदर्शनको कायर्यक्रम हुनु सिंगो लुम्बिनी प्रदेशको गौरवको विषय भएको बताइन् ।
प्राध्यापक राजेन्द्र कुँवरले यस्ता कार्यक्रमले नेपाली भेषभूषा र संस्कृतिको संरक्षण तथा प्रवद्र्धनमा सकारात्मक भूमिका खेल्ने बताए । उनले यस्ता प्रतियोगिताले आत्मविश्वास, नेतृत्व क्षमता र सिर्जनात्मक सोचको विकास गराउने उल्लेख गरे ।
कार्यक्रममा तालिम पूरा गरी ग्राजुएट भएका डिजाइनरहरूलाई प्रमाणपत्र वितरण गरिएको थियो । साथै ‘स्टुडेन्ट अफ द मन्थ’ अवार्ड प्रदान गरिएको थियो ।
प्रतियोगितामा कल्पना सुवेदी प्रथम भइन् भने आशा पुन बुढाथोकी दोस्रो तथा दिव्य बालाल तेस्रो भएका थिए ।
यस्तै ‘मल्टिमिडिया विनर’को उपाधि दिव्य बालालले प्राप्त गरिन् भने ‘भ्यूअर्स च्वाइस विनर’ कल्पना सुवेदी र ‘पिपुल्स च्वाइस विनर’ आशा पुन बुढाथोकी घोषित भए ज। । कार्यक्रममा फेशन डिजाइनरहरू बिनिता राना, धनमती सुनार, यानुका सारु, सिमरन श्रेष्ठ, सर्मिला बम्रेल, मनिषा घर्ती मगर, आशा पुन, आरती कर्ण, सुष्मा गुरुङ र सिर्जना गुरुङले पनि उत्कृष्ट डिजाइन प्रस्तुत गरेका थिए ।
प्रशिक्षार्थी फेसन डिजाइनरहरुको कला र क्षमताको प्रोत्साहनका लागि हिमांशु बुटिक एण्ड ट्रेनिङ सेन्टरले हरेक वर्ष डिजाइनर रनवे प्रतियोगिता गर्दै आएको संस्थाकी सञ्चालक हिरा पेग्नी मगरले बताइन् ।
यस्तो कार्यक्रमले नयाँ तथा उदाउँदा डिजाइनरलाई आफ्नो सिर्जना प्रस्तुत गर्ने अवसर प्रदान गर्ने उनको भनाई छ । कार्यक्रममा डा. तारा प्रसाद गिरीले यस्ता कार्यक्रमले फेसन डिजाइन व्यवसाय र सिर्जनशीलतालाई प्रवद्र्धन गर्ने बताए ।
कवि यज्ञलाल सुवेदीले कविता वाचनमार्फत हिमांशु बुटिकले गरेको फेसन डिजाइनमा गरेको योगदानको सराहना गरेका थिए । कार्यक्रम सञ्चालन रेशम न्यौपानेले गरेकी थिइन् ।
