भैरहवा 
भारतको उत्तर प्रदेशस्थित कुशीनगरमा आकर्षक जागिर र सुखद भविष्यको प्रलोभनमा परेर महिनौँदेखि बन्धक बनाइएका ४ सय ५३ जना नेपाली युवायुवतीहरूलाई उद्धार गरिएको छ ।

भारतीय प्रहरी, नेपाल प्रहरी, किन इन्डियालगायत विभिन्न सरोकारवाला निकायको सहकार्यमा संयुक्त अपरेसनमार्फत् सुरक्षित उनीहरुलाई उद्धार गरी भैरहवा ल्याइएको हो ।

भारतको उत्तर प्रदेशस्थित कुशीनगरबाट उद्धार गरिएका ४ सय ५३ नेपालीलाई जिल्ला प्रहरी कार्यालय, रुपन्देहीमा राखेर छानबिन सुरु गरिएको छ । यसरी ल्याइएकामध्ये कति जना पीडित र कति जना पीडक हुन भनेर छुट्याउन शनिबार दिउँसोबाट छानबिन थालिएको हो । भारतबाट आठ वटा बसमा सिधैं जिल्ला प्रहरी पु¥याइएका उनीहरुलाई पालैपालो बसबाट उतारेर अनुसन्धान भइरहेको छ ।
प्रहरीले पीडितलाई आफन्तको जिम्मा लगाउने र पीडकमाथि थप अनुसन्धान गरिने जनाएको छ । शनिबार मध्यान्ह उनीहरुलाई कुशीनगरबाट बेलहिया नाका हुँदै नेपाल ल्याइएको थियो ।

भारतस्थित नेपाली दूतावासको पहल र समन्वयमा नेटवर्किङ विजनेशको कार्यालयबाट उनीहरुलाई उद्धार गरिएको थियो । उद्धार गरिएका नेपालीसँगै दूतावासका कर्मचारी पनि रुपन्देही आएका छन् । नेपाली दूतावासका मिनिस्टर कन्सुलर अम्बिका जोशीले नेटवर्किङ मार्केटिङका कारण पीडित बनेका व्यक्तिको गुनासोका आधारमा लामो समय अध्ययन गरेपछि नेपालीको उद्धार गरिएको जनाए । उद्धारका लागि उत्तर प्रदेश सरकारले पनि सहयोग गरेको उनको भनाइ छ ।

दूतावासका काउन्सेलर पब्लिक अफेयर्स नेपाल प्रहरीका एसएसपी प्रकाश मल्लले ६ महिनासम्म अध्ययन गरेपछि उत्तर प्रदेश र कुशीनगर प्रहरीसँगै लुम्बिनी प्रदेश प्रहरीसित समन्वयमा उद्धार कार्य सफल तुल्याइएको बताए । उद्धार कार्यमा किन इण्डिया संस्थाको भूमिका महत्वपूर्ण रहेको बताए । मनग्गे कमाई हुने प्रलोभन देखाएर नेटवर्किङ मार्केटिङमा लगाउने र पछि आफूले भने बमोजिम नभएमा त्यहाँ पुगेका युवालाई मानसिक तनाव दिने गरेको उनले बताए । यसका सञ्चालन कर्ता र पीडित दुबै नेपाली पाइएको उनले बताए । खासगरी सीमाबाट नजिक रहेका भारतीय शहरमा यस्तो काम भइरहेको उनले बताए ।
किन इण्डिया संस्थाका नवीन जोशीले उक्त संस्थामा आबद्ध नेपालीको अवस्थाबारे पटकपटक रेकी गरेपछि मात्र उद्धार गरिएको बताए । एउटै कोठामा १५–१६ जनासम्म सुताइएको र गर्मीमा राहत पुग्ने कुनै आधार नरहेको उनले बताए । ‘सुरुमा धेरै पैंसा कमाउने प्रलोभन दिएर नेपालका विभिन्न जिल्लाका बासिन्दालाई कुशीनगर लग्ने गरिएको थियो,’ उनले भने–‘त्यहाँ पुगेपछि तालिम दिने र थप आफन्त बोलाउन दबाब दिने गरेका थिए ।’

सञ्चालकको चाहनाअनुसार नभएको खण्डमा मानसिक दबाब दिएर पीडित तुल्याउने गरेको उनले बताए । उक्त संस्थाबाट उम्किएका व्यक्तिको गुनासोपछि उद्धारका लागि पहल गरेको उनले जनाए ।
यसअघि आकर्षक जागिर र राम्रो कमाई हुने प्रलोभन देखाएर नेपालीहरूकै एक गिरोहले नेपालका विभिन्न जिल्लाका युवायुवतीलाई कुशीनगर पु¥याएर बन्धक बनाइरहेको सूचना पाएपछि लुम्बिनी प्रदेश र रूपन्देही प्रहरीले अपरेसन सुरु गरेको थियो । नेपाल प्रहरीको अपरेसनलाई उत्तर प्रदेशका मुख्यमन्त्री योगी आदित्यनाथले पनि महत्वपूर्ण सहयोग गरेका थिए । गिरोहले नेपालबाट आकर्षक जागिरको प्रलोभन देखाएर सुनौली हुँदै कुशीनगर पु¥याउने र त्यहाँ प्रतिव्यक्ति ७ हजार भारतीय रुपैयाँदेखि १ लाखसम्म रकम असुल गरेर सदस्यता बिस्तार गर्दै नेटवर्किङ व्यवसायको शैलीमा सदस्यता बिस्तार गर्दै लैजाने गरेका थिए ।
कुशीनगरमा लुम्बिनी प्रदेश, कोशी प्रदेश र सुदूरपश्चिम प्रदेशका गरी कम्तीमा एक हजार युवायुवतीलाई लगेर बन्दी बनाइएको सूचना प्राप्त गरेको रूपन्देही प्रहरी प्रमुख जनकबहादुर शाहीले बताए । ‘त्यही सूचनाका आधारमा पिछा गरेर बन्धक बनाएर राखिएको स्थल पत्ता लागेपछि भारतीय प्रहरीको सहयोगमा उद्धार गरिएको हो,’ उनले भने–‘यसबारे थप अनुसन्धान भइरहेको छ ।’ कुशीनगरमा बन्धक बनाएर फिरौती रकमसमेत माग गरिएको भन्दै पीडितका आफन्तले इलाका प्रहरी कार्यालय बुटवलमा उजुरी दिएका थिए ।

प्रहरीले त्यही उजुरीका आधारमा अनुसन्धान सुरु गरेको इलाका प्रहरी कार्यालय बुटवलका प्रहरी नायब उपरीक्षक निशान्त श्रीवास्तवले बताए । ‘चार दिनको निरन्तर प्रयासपछि उत्तरप्रदेशका मुख्यमन्त्री योगी आदित्यनाथ र भारतीय प्रहरीको सहयोगमा पीडितको उद्धार गर्न सफल भएका छौं,’ उनले भने–‘नेपालका विभिन्न जिल्लाबाट त्यहाँ पु¥याएर प्रतिसदस्य १ लाख भारतीय रुपैयाँ शुल्क लिएर सदस्यता बिस्तार गर्ने र सदस्य बन्न नसक्नेहरूको परिवारलाई धम्क्याएर रकम असुलीको प्रयास गर्ने गरेको देखिएको छ ।’ जागिरको प्रलोभनमा त्यहाँ पु¥याइएका युवायुवतीलाई एक समूहले तालिम दिने र अर्को समूहले सदस्यता शुल्क लिएर सदस्य बिस्तारमा लगाउने गरेको उनले बताए ।