गरिब हुनु कसैको रहर हुँदै होइन् । उनीहरुको पनि बाँच्ने अधिकार हुन्छ । बाँच्नकै लागि उनीहरु सडकमा विभिन्न पेशा र व्यवसायमा संलग्न हुन्छन् । उनीहरुसँग लगानी गर्ने पुँजी छैन । जीविकोपार्जनको कुनै माध्यम छैन । जेनतेन सडकमा बाँच्ने आधार जुटाउने गरिबप्रति राज्य अनुदार हुनु निन्दनीय छ ।
सुर्खेतमा काफल बेच्दै गरेकी महिलाको काफल फ्याकेर अमानवीय काम भयो । काठमाडौंमा मकै पोल्दै गरेकी महिलाको ठेला खोसेर अमानवीय क्रियाकलाप भयो । पछिल्लोपटक कैलालीमा वन अतिक्रमण हटाउने क्रममा कर्मचारीले टेम्पो भिरबाट खसालेर निन्दनीय काम गरेका छन् । गोदावरी नगरपालिका–४ को बाँसपानीमा सडक छेउमा राखेर खुद्रा सामान बिक्री गर्न पुरानो टेम्पो गोदावरीकै धनादेवी धामीले प्रयोग गरेकी थिइन् । टेम्पोबाट कर्मचारीले सामान झारेपछि टेम्पो घर लैजान्छु भन्दा पनि नमानेर सडकबाट भिरमा खसाली दिएको धामीको भनाइ छ । डिभिजन वन कार्यालयका कर्मचारीले नियतबश नभई अतिक्रमण पन्छाउँदा टेम्पो खसेको बताएका छन्, तर टेम्पो खसेको भिडियो हेर्दा जबर्जस्ती टेम्पो धकेलेर भीरबाट फालेको देखिन्छ ।
पहिले रिक्सा भीरबाट खसाइएको रहेछ । अहिले टेम्पो खसाइयो । टेम्पोमा सामान ल्याएर बिक्री गर्ने र साँझ घर जाने गरी व्यवसाय गर्दा वनका कर्मचारीले सम्झाइबुझाई गर्न सक्थे । तर सडकमा हुने व्यापार रोक्ने नै हो भने त्यो हटाउने काम सडक डिभिजनको काम हो । प्रक्रियागत ढंगले वनका कर्मचारीले गल्ती गरे । अर्को कुरा अतिक्रमण गरी व्यापार गरेको भए पनि भीरबाट टेम्पो खसाल्नु अमानवीय काम हो । कानुन प्रयोग र कार्यान्वयन गर्ने निकायले कानुन हातमा लिने कामले सुशासन दिँदैन । सामाजिक सञ्जालमा भीरबाट खसिरहेको टेम्पोमा भइरहेको आलोचनापछि प्रहरीले १० कर्मचारीलाई नियन्त्रणमा लिएको छ । अब प्रहरीले टेम्पो आफँै खसेको हो वा खसाइएको हो, प्रष्ट छानबिन गर्नुपर्छ । खसाइएको हो भने वन कर्मचारीलाई कानुनअनुसार कारबाही हुनुपर्छ ।
अहिले सरकारलाई केही नयाँ काम गर्ने हुटहुटी छ । संघीय सरकारको नयाँ काम गर्ने हुटहुटीपछि प्रदेश र स्थानीय सरकार पनि दबाबमा छन् । काम गर्ने हुटहुटीमा ढंग पुग्दा राम्रो नतिजा निस्कन्छ । काम गर्ने ढंग नपुग्दा नतिजा प्रतिकुल आउँछ । राज्यले कानुन हातमा लिएर अमानवीय क्रियाकलाप गर्दै जादा नागरिक प्रतिरोध बढ्दै जान्छ । अन्ततः सरकार कमजोर हुन्छ । जनमतको बल राम्रो गर्नका लागि हो, प्रतिरोध बढ्दै गए चुनावमा प्राप्त शक्ति कमजोर बन्न अर्को चुनाव कुर्न पर्दैन ।
