बुटवल । पाल्पाको रिब्दिकोट गाउंपालिकमा सञ्चालित सिर्जना फार्म (एग्रो रिसोर्ट) र लुम्बिनी केबलकार लि. बुटवलबीच पर्यटन प्रवद्र्धन सम्झौता भएको छ ।
सम्झौता अनुसार लुम्बिनी केबलकारले सिर्जना फार्मका पाहुना तथा ग्राहकलाई केबलकारको टिकटमा १० प्रतिशत तथा रिसोर्टका सञ्चालक र कर्मचारीलाई २० प्रतिशत छुट दिने छ । साथै दुबै संस्थाबीच एक आपसमा दुबै ठाउंको पर्यटन प्रवद्र्धनमा सहकार्य गर्ने छन् ।
५ सय रोपनी क्षेत्रफल रहेको सिर्जना फार्म पाल्पाको सबैभन्दा ठूलो पर्यटकीय गन्तब्य हो । यहाँ बाट नजिकैमा भैरबस्थान मन्दिर, रुरु ऋषिकेश मन्दिर रिडि र रानिमहल पर्छन् । फार्ममै पालिएका भैंसीको दुध तथा खसी बोका, कुखुराको मासु तथा फार्ममै उत्पादित अर्गानिक तरकारी फलफूलका कारण यहां वर्षेनी हजारौं पर्यटक जाने गर्छन् ।
सिर्जना फार्ममा गएका आन्तरिक तथा वाह्य पर्यटकले केबलकारको टिकटमा छुट पाउन त्यहां गएर बसेको कुनै न कुनै प्रमाण देखिने कागजात टिकट काउन्टरमा देखाउनुपर्नेछ ।
लुम्बिनी केबलकारका अपरेसन म्यानेजर डिएन कायस्थ सैंजू र म्यानेजर प्रज्व्ल घिमिरे तथा सिर्जना फार्मका मार्केटिङ म्यानेजर कमल प्रसाद पौडेल बीच बुधबार केबलकारको कार्यालयमा सम्झौता पत्रमा हस्ताक्षर गरी एक आपसमा आदान प्रदान भएको छ ।
सम्झौतापछि सिर्जना फार्मका मार्केटिङ म्यानेजर कमल प्रसाद पौडेलले लुम्बिनी प्रदेशकै पहिलो र नेपालको दोस्रो लामो दूरीको लुम्बिनी केबलकारसंगको सम्झौताले आफना ग्राहकले समेत छुट पाएर लाभान्वित हुने बताए ।
सो अवसरमा केबलकारका अपरेसन म्यानेजर डिएन कायस्थ सैंजूले अष्ट्रियाको डुपलमायर कम्पनीबाट निर्मित लुम्बिनी केबलकार विश्वमै सबैभन्दा अत्याधुनिक प्रविधि र सुरक्षित केबलकार भएको बताए ।
एक दिनमा ६ हजार जनालाई आवतजावत गराउन सक्ने केबलकारको टप स्टेशन पाल्पाको बसन्तपुर डांडामा छ । त्यहां प्रख्यात शक्तिपीठ कामाख्या मन्दिर, सय वर्ष पुरानो दुर्गा मन्दिर, जीपलाइन, स्काइ साइक्लिङ, आधुनिक पिङ, बाल उद्यान, रेष्टुरेन्ट, सेमिनार हल लगायत पर्यटकीय पुर्वाधार छन् ।
प्राकृतिक हिसाबले स्वच्छ, शान्त हरियालीयुक्त र मनोरम बसन्तपुरमा गर्मीमा शीतल र जाडोमा घाम लाग्ने हुंदा जुनसुकै मौसममा पर्यटकको रोजाइको थलो बनेको छ ।
