सत्तारूढ राष्ट्रिय स्वतन्त्र पार्टीको महाधिवेशन आजदेखि चितवनमा सुरु हुँदैछ । झण्डै दुई तिहाईको जनमतका साथ सरकार सञ्चालन गरिरहेको रास्वपाको महाधिवेशन यस अर्थमा महत्वपूर्ण छ कि महाधिवेशनले पार्टीको सांगठनिक व्यवस्थापन र नीतिगत प्रष्टता गर्नेछ । कुनै पनि राजनैतिक दलका लागि महाधिवेशन नयाँ उर्जाको माध्यम हो, अझ रास्वपाका लागि त्यो उर्जाको सही व्यवस्थापन गरी पार्टीलाई तल्लो तहसम्म व्यवस्थापन गर्ने र वैधानिकता दिने महत्वपूर्ण थलो हुनेछ ।
स्थापनाको छोटो समयमै सत्ता सञ्चालनको चाँवी हातमा लिएको रास्वपा अनेकौं आशंका र संशयमा गुज्रिएको छ । जनमत दुई तिहाई नजिकको आएपनि संगठनात्मक व्यवस्थापन र नीतिगत प्रष्टताका लागि दबाब परिरहेको बेला महाधिवेशन आयोजना गरेर नेतृत्वले पार्टीका लागि अनुकुल अवस्था निर्माण गरेको छ । तल्लो तहसम्म संगठनको अभावमै लहरको भरमा गएको चुनाव जितेको रास्वपाका निम्ति अबका चुनाव संगठन अपरिहार्य हुनेछ किन कि लहर सधैँ आउँदैन् । नेपाली समाज एउटै पार्टीका पछि सधँै कुदिरहँदैन्, त्यसका लागि जनतासँग जोडिने माध्यम चाहिन्छ, त्यो भनेको संगठन हो । जनतासँग भिजेका र भिज्ने व्यक्तिलाई संगठनमा स्थापित गर्ने र विधिसम्मत हिंडाउने सार्मथ्य राख्न सक्दा नै एउटा सबल पार्टी बन्छ । जिल्ला र प्रदेश अधिवेशनमा कतिपय ठाउँमा भएको झडपले रास्वपाभित्र समाजमा बढ्दो अराजकताले कब्जा जमाउने जोखिम छ । त्यो जोखिमको व्यवस्थापनको खाका यो महाधिवेशनले ल्याउन सक्दा आगामी दिनमा एउटा अनुशासित संगठन बन्न सक्नेछ, तर अराजकताको आगोलाई चिम्लिने प्रवृत्ति हावी भएमा रास्वपा निर्माण र व्यवस्थापन जटिल बन्दै जानेछ । आन्तरिक लोकतन्त्रमा सबल बनाउन खोज्दा नै सरकारको सफलता निर्भर रहन्छ । अहिले सरकार लोकतान्त्रिक परिपाटीले चलेको नभई जोरजबर्जस्ती र विधिको उल्लंघन गरी सञ्चालन भइरहेको भन्दै आलोचना भइरहेको बेला पार्टीको आन्तरिक लोकतन्त्रलाई सबल बनाउन खोज्दा सरकार सञ्चालन पनि लोकतान्त्रिक विधिबाट सञ्चालन गर्न सघाउ पुग्नेछ । लोकतान्त्रिक विधिलाई कुल्चदा समाजमा हुने विष्फोटले अन्ततः रास्वपालाई किनारामा पु¥याउने छ नै, मुलुकले पनि मूल्य चुकाउने छ ।
कुनै वैचारिक धरातलको आधारमा खडा भएको पार्टी नभई रास्वपा नेपाली समाजमा देखिएको असन्तुष्टिमा खेलेर निर्माण भएको पार्टी भएकाले अब वैचारिक प्रष्टता दिन उत्तिकै आवश्यक छ । उदार आर्थिक नीति अगाल्ने लोकतान्त्रिक पार्टी भनिए पनि विगतमा संघीयताप्रति असहिष्णु नेतृत्व अहिले त्यसप्रति सकारात्मक छ । संघीयता र गणतन्त्रप्रति जति प्रष्ट हुँदै गएको छ, धर्म निरपेक्षता र समावेशीताप्रति पनि उसको प्रष्टता आवश्यक छ किन भने अस्पष्टताले राजनैतिक दल समस्याको जालोमा जेलिन्छन् । झण्डै तीन हजार प्रतिनिधि पर्यवेक्षक सहभागी महाधिवेशन यो महाधिवेशनले सांगठनिक व्यवस्थापन र वैचारिक प्रष्टता लिन सक्दा मुलुकले पनि सही लय समात्छ किन कि रास्वपाले सत्ता सञ्चालनको जिम्मा पाएको छ ।
