अर्घाखाँची । शीतगंगा नगरपालिकाकी उप–प्रमुख गीता भाट क्षेत्रीले सामुदायिक विद्यालयमा प्रदान गरिँदै आएको शिक्षाको गुणस्तर सुधार गर्न सबै पक्षको सक्रिय भूमिका आवश्यक रहेको बताएकी छन् । शीतगंगा नगरपालिकाको आयोजना तथा दलित चेतना विकास परिषद् अर्घाखाँचीको सहजीकरणमा सञ्चालित “उप–प्रमुख शैक्षिक सुधार कार्यक्रम” अन्तर्गत वडा नं. १३ स्थित रिकोट माध्यमिक विद्यालय र वडा नं. १४ स्थित प्रभाकर माध्यमिक विद्यालयमा आयोजित कार्यक्रममा बोल्दै उप–प्रमुख क्षेत्रीले सामुदायिक विद्यालयहरू पूर्वाधारका दृष्टिले सबल भए पनि शैक्षिक उपलब्धि अपेक्षाअनुसार हासिल हुन नसकेको उल्लेख गरिन् ।
उनले विद्यालयमा शिक्षकले प्रदान गर्ने शिक्षामात्र पर्याप्त नहुने भन्दै अभिभावकहरूलाई पनि आफ्ना बालबालिकाको सिकाइ, व्यवहार, रुचि र सोंचबारे नियमित जानकारी राख्न आग्रह गरिन् । शिक्षा सुधारका लागि शिक्षक, विद्यार्थी र अभिभावकबिचको सहकार्य अपरिहार्य रहेको बताउँदै उनले शिक्षाको विकाससँगै नगरको समग्र विकास सम्भव हुनेमा जोड दिइन् ।
कार्यक्रममा प्रमुख प्रशिक्षक तथा भगवती माध्यमिक विद्यालय, सन्धिखर्क–२ का प्रधानाध्यापक ध्रुवबहादुर केसीले शिक्षा कुनै पनि समाजको विकास, रूपान्तरण र समृद्धिको आधार भएको उल्लेख गर्दै गुणस्तरीय शिक्षाले मात्र सक्षम नागरिक निर्माण गर्न सक्ने बताए । उनले दिगो विकास, सामाजिक न्याय र आर्थिक समृद्धिका लागि गुणस्तरीय शिक्षाको भूमिका अत्यन्त महत्वपूर्ण रहेको धारणा व्यक्त गरे ।
त्यस्तै, सरस्वती माध्यमिक विद्यालय, शीतगंगा–२ का प्रधानाध्यापक तथा प्रशिक्षक खुम बेल्वासेले शिक्षा सुधार सामान्य विषय नभएको उल्लेख गर्दै यसका लागि विद्यालय, अभिभावक, समुदाय तथा सरकार सबै तहको समान जिम्मेवारी रहने बताए । उनले शिक्षाको रूपान्तरणमार्फत् समाजमा सकारात्मक परिवर्तन सम्भव हुने धारणा राखे ।
प्रशिक्षक राधा नेपालीले शिक्षा सुधार आजको अपरिहार्य आवश्यकता बनिसकेको बताउँदै यसको सफल कार्यान्वयनका लागि सबै सरोकारवालाको प्रतिबद्धता आवश्यक रहेको बताइन् । कार्यक्रममा विभिन्न विद्यालयका प्रधानाध्यापक, विद्यालय व्यवस्थापन समिति अध्यक्ष, शिक्षा क्षेत्रका अगुवा, समाजसेवी तथा सरोकारवालाहरूले प्रविधिमैत्री शिक्षण प्रणालीको विकासमा जोड दिएका थिए । उनीहरूले प्रविधिको विस्तारसँगै बालबालिकाको सिकाइ शैलीमा परिवर्तन आएको उल्लेख गर्दै विद्यालय, शिक्षक, अभिभावक र सरकारले समयानुकूल शैक्षिक वातावरण निर्माण गर्नुपर्ने आवश्यकता औंल्याए ।
वक्ताहरूले सामुदायिक विद्यालयका विद्यार्थीहरूको शैक्षिक उपलब्धि निजी विद्यालयको तुलनामा अझैँ पछाडि रहेको भन्दै आधुनिक प्रविधि, शैक्षिक सामग्री र शिक्षकको क्षमता अभिवृद्धिमार्फत् शिक्षण सिकाइ प्रक्रियालाई प्रभावकारी बनाउनुपर्ने धारणा राखेका थिए ।
शैक्षिक गुणस्तर सुधार गर्ने उद्देश्यले सञ्चालन गरिएको उक्त कार्यक्रम वडा नं. २ स्थित सरस्वती माध्यमिक विद्यालय, वडा नं. ४ स्थित ज्योति माध्यमिक विद्यालय, वडा नं. ५ स्थित सुधा माध्यमिक विद्यालय, वडा नं. १३ स्थित रिकोट माध्यमिक विद्यालय तथा वडा नं. १४ स्थित प्रभाकर माध्यमिक विद्यालयलगायतका सामुदायिक विद्यालयहरूमा सञ्चालन गरिएको नगरपालिकाले जनाएको छ । कार्यक्रमको सहजीकरण पत्रकार अनिल नेपालीले गरेका थिए ।
