पाल्पा
स्वस्थ आमा, स्वस्थ बच्चासहित समृद्ध समाज निर्माण गर्दै पोषणमैत्री गाउँपालिका घोषणा गर्ने अभियानका साथ रम्भा गाउँपालिकाले पालिका भरीका १५ जना स्माट आमाहरुलाई सम्मान गरेको छ । पाँच वटै वडाका तीन तीन वटा स्माट आमाहरुलाई पालिकाले दोषल्ला ओढ्याएर, नगद १० हजार रुपैयाँ र स्वास्थ्य सामग्रीबाट सम्मान गरेको हो । सुनौलो हजार दिनका आमाहरु बिच प्रतिष्पर्धा गराएर विभिन्न २२ वटा स्वास्थ्य सूचकको आधारमा, प्रति सूचक ५ अंकका दरले ११० अंक ल्याउने आमालाई स्माट आमा घोषणा गरी गाउँपालिकाले सम्मान गरेको हो ।
स्वास्थ्य संस्थामा अनिवार्य प्रसूति भएको, गर्भवती भएको सुनिश्चित भएपछि फोलिक एसिड सुरु गरेको, ३ महिनापछि जुकाको औषधी खाएको, कम्तीमा ४ पटक गर्भ जाँच गरेको, टी.डी. खोप लगाएको, गर्भवती र सुत्केरी अवधीमा २२५ वटा आईरन र क्यालसियम खाएको, बच्चाको जन्मतौल २.५ केजीभन्दा माथि भएको, पिनसी जाँच ३ पटक गरेको, सुत्केरीपछि बच्चालाई पूर्णरुपमा स्तनपान गराएको र समयमै अन्य खानपान सुरु गरेको, प्रोटोकलअनुसार बच्चालाई पूर्णखोप लगाएको, सूचक पूरा हुनुपर्दछ ।
यसैगरी प्रत्येक महिना बच्चाको तौल तथा उचाई नापजाँच गरेको, बालभिटा खुवाएको, बच्चालाई नियमित रुपमा भिटामिन र जुकाको औषधी खुवाएको, बच्चा जन्मिएपछि हालसम्म कार्ड रुजु गरेको, आमा र बच्चाको सरसफाइ नियमित रुपमा भएको, गर्भान्तर कम्तिमा २ वर्षको रहेको, आमा र बच्चा कुपोषित नभएको, धुम्रपान र मध्यान नगर्ने आमा, बच्चाको जन्मदर्ता गरेको, महिनावरी स्वच्छतासम्बन्धी ज्ञान भएको जस्ता २२ वटा स्वास्थ्य सूचकहरु पुरा गर्ने आमाहरु, स्माट आमाको रुपमा सम्मानित भएका हुन् । गाउँपालिकाका अध्यक्ष विष्णुप्रसाद भण्डारी, उपाध्यक्ष राधाकुमारी श्रेष्ठ, प्रमुख प्रशासकीय अधिकृत वीरबहादुर पुन, विभिन्न वडाका वडा अध्यक्षहरु, स्वास्थ्य शाखा प्रमुख शिवप्रसाद अर्याललगायतले टिकामाला, दोषल्ला लगाई स्माट आमाहरुलाई सम्मान गरे ।
गर्भ रहेदेखि बच्चा २ वर्षको उम्मेर हुँदासम्मको २०८१ साल फागुन १ गतेदेखि २०८२ साल फागुन मसान्तसम्म १ हजार दिन पूरा भएका आमाहरुको २२ वटा स्वास्थ्य सूचकहरुको वडा वडाका स्वास्थ्य संस्था, स्वास्थ्यकर्मी, महिला स्वयम्सेविकाका परीक्षण गरी ११० अंक ल्याएका मध्येमा प्रथम, द्वितीय र तृतीय स्थान ल्याएका स्माट आमाहरुलाई पालिकाले उच्च मूल्याङ्कन गरी सम्मान गरेको हो ।
सम्मानित हुने स्माट आमाहरुमा वडा नं. १ बाट ३३ जना आमाहरुमध्ये, बोलकुमारी थापा, सरस्वती घर्ती, हेमा राना वडा नंं. २ बाट १७ जना आमाहरुमध्ये, सावित्रा सुनारी, धनिमाया सिंजाली, हेमा राना, वडा नंं. ३ बाट ४८ जना आमाहरु मध्ये उमा सारु थापा, सीताकुमारी भुल, टिकाकुमारी झेडी, वडा नं. ४ बाट २० आमाहरुमध्ये मनिषा मश्राङ्ग र वडा नं. ५ बाट २० आमाहरुमध्ये यस्मिता केम्छाकी, निरमायाँ सिंजाली र केशरी सारु रहेका छन् । पालिकाबाट १३८ जना आमाहरु प्रतिष्पर्धामा सहभागी भए पनि १५ जना स्माट आमाहरु सम्मानित भएका हुन् ।
गाउँपालिकाले २०८७ साल जेठ मसान्तसम्म रम्भा गाउँपालिकालाई पोषणमैत्री स्थानीय शासन कार्यान्वयन भएको गाउँपालिका घोषणा गर्ने अभियानका साथ स्माट आमा सम्मान कार्यक्रम सञ्चालन गरेको हो । पोषणमैत्री गाउँपालिका घोषणा हुनको लागि स्वास्थ्य, महिला तथा बालबालिका, शिक्षा, खानेपानी, सरसफाइ र स्वच्छता, कृषि, पशुपंक्षी र शासकीय स्वचछता गरी ७ वटा क्षेत्रबाट ५१ वटा सूचकहरु पूरा हुनुपर्ने प्रावधान रहेको छ ।
पालिकाको स्वास्थ्य शाखाले पोषणसम्बन्धी चालु आर्थिक वर्षमा भएका कामहरु कार्यक्रममा जानकारी गराएको छ । कम तौल भएका एक वटा पनि बच्चा नजन्मिएको, ६ महिनादेखि ५ वर्षसम्मका ७२४ जना बालबालिकाको स्वास्थ्य परीक्षणमा ८ जना मध्यम कुपोषित र १ जना कडा कुपोषित मात्र भेटिएको, पालिकाको सबै विद्यालयमा १० वर्षदेखि १९ वर्षसम्मका ४३५ जना किशोरीहरुको रक्तअल्पता परीक्षण गरेको जसमा २६ जना मोडेरट र ५६ जना मिल्ड लक्षण देखिएको, ४२६ जना आमाहरुलाई तरकारी बिउबिजन वितरण गरेको, १७३ जना गर्भवती महिलाहरुलाई पानी शुद्धीकरण गर्ने स्टिल फिल्टर वितरण गरेको, वडा नं. १ हुँगी र वडा नं. ३ पिपलडाँडा स्वास्थ्य चौकीलाई पोषणमैत्री संस्था घोषणा गरिएको, बालबालिकाहरुलाई पोषण स्वास्थ्य समस्या समाधानको लागि ४ वटा ओटिसी उपचार केन्द्र सञ्चालनमा आएको पालिका स्वास्थ्य शाखा प्रमुख शिवप्रसाद अर्यालले जानकारी गराए ।
