लोकतन्त्रमा प्रेस स्वतन्त्र हुन्छ । प्रेस स्वतन्त्रताविना लोकतन्त्रको कल्पना गर्न सकिंदैन । सोमबार बिहानै केही सञ्चार गृहको मुलद्वार अघि शंकास्पद गाडी पार्किङ् गरी आवतजावत अवरोध गरेर प्रेसलाई आतंकित बनाउन खोजिएको छ । काठमाडौंमा कान्तिपुर दैनिक, हिमालय टेलिभिजन र अनलाइन खबरको कार्यालयको मुलढोका अघि गाडी पार्किङ् गरियो, यसले सञ्चारगृहमा कार्यरत पत्रकारलगायत कर्मचारीका गाडी आवतजावत बन्द भयो । यसले प्रेसलाई स्वतन्त्रतापूर्वक काम गर्न अवरोध भयो । सञ्चारगृहमाथि मनोवैज्ञानिक दबाबमा राख्न गरिएको हर्कत निन्दनीय छ ।
प्रेसले स्वतन्तापूर्वक काम गर्न पाउँदा लोकतान्त्रिक प्रणाली संस्थागत र तन्दुरुस्त हुन्छ । जब प्रेसमाथि दबाब श्रृजना गर्न खोजिन्छ, लोकतान्त्रिक प्रणाली संस्थागतमा बाधा उत्पन्न हुन्छ । अहिले भइरहेका क्रियाकलापले प्रेसलाई नियन्त्रण गर्न खोजिएको छ । सरकारका गतिविधिले प्रेसलाई नियन्त्रण गर्न खोजिएको संकेत मिलेको छ । स्वतन्त्र सञ्चारगृहमाथि लगाइएको आर्थिक नाकाबन्दीले त्यसैको एउटा उदाहरण हो । सोमबार सञ्चारगृहको कार्यालय अघि शंकास्पद गाडी पार्किङ् हुँदा प्रहरीले हटाउन बेवास्ता गर्नुले पनि सरकारका गतिविधि प्रेस स्वतन्त्रता मैत्री छैनन् । अझ गाडी पार्किङ् गर्नेहरु नै राष्ट्रिय स्वतन्त्र पार्टीका नेता कार्यकर्ता भएको खुल्न थालेको छ । कान्तिपुरको कार्यालयअघि गाडी पार्किङ् गर्ने रौतहटका रास्वपा नेता रवि जयसवालको भएको खुलेको छ । रविलाई गत जेठमा महामन्त्री भुपदेव शाहले अनुसन्धान विभागको सदस्यमा मनोनित गरेका थिए । अरु कार्यालयमा पार्किङ् भएका गाडीधनीको पनि पहिचान खुल्दै जाला । सुकुम्वासीप्रति सरकारले गरेको अमानवीय व्यवहार र गणेश नेपालीको आत्मदाहमा भएको मिडिया टिप्पणीलाई लिएर विरोध स्वरुप पार्किङ् भएको हुनसक्छ । लोकतन्त्रमा मिडिया सधँै प्रतिपक्ष हुन्छ । मिडियाको काम खबरदारी गर्ने हो, त्यो खबरदारीलाई पचाउन नसक्नेले मिडियालाई मनोवैज्ञानिक दबाबमा राख्नखोज्नु निन्दनीय छ । सरकारले नै त्यस्तो समूह खडा गरी काम गरेको भए अझ चिन्ताको विषय हो । यद्यपी सत्तारुढ राष्ट्रिय स्वतन्त्र पार्टीले यस्तो गतिविधिको निन्दा गर्दै दोषीलाई कारबाही गर्न सरकारको ध्यानाकर्षण गराएको छ ।
अब सरकारले यस्ता अराजक गतिविधि गर्नेलाई कानुनअनुसार कारबाही गरी यी घटनामा आफ्नो संलग्नता छैन भन्ने पुष्टि गर्नुपर्छ । सरकारले कानुनी कारबाही गर्न बेवास्ता गरे सरकारको संलग्नता पुष्टि हुनेछ । प्रेस स्वतन्त्रता विरोधी यस्ता क्रियाकलाप रोक्ने काम सरकारको हो, सरकारले यस्ता क्रियाकलाप रोक्न बेवास्ता गर्दा अन्ततः सरकारको भूमिकामाथि प्रश्न उठ्ने छ । त्यसबेला राष्ट्रिय स्वतन्त्र पार्टीले विज्ञप्ति निकालेर औपचारिकता दिएर मात्रै हुन्न । यस्ता क्रियाकलापको जिम्मा लिंदै रोक्न सरकारलाई निर्देशन र घटनाप्रति क्षमा माग्नुपर्छ ।
