काठमाडौं । अमेरिकामा जारी विश्वकप फुटबललाई नेपालमा निजी लगानीको हिमालय टेलिभिजनले प्रत्यक्ष प्रशारण गरिरहेको छ । तर, प्रतियोगीताका अन्तिम दुई म्याचहरू भने सरकारी स्वामित्वको नेपाल टेलिभिजनबाट पनि प्रशारण हुँदैछन् ।
तेस्रो स्थानका लागि आज राति भएको फ्रान्स र ईंग्ल्याण्डबीचको खेल नेपाल टेलिभिजनबाट पनि प्रशारण भएको थियो । साथै, भोलि राति हुने अर्जेन्टिना र स्पेनबीचको फाइनल हिमालय र हिमालय स्पोर्ट्ससँगै एनटीभीमा पनि आउने छ । खेलकुदमन्त्री सस्मित पोखरेलले सरकारी टिभीमा विश्वकपको फाइनल प्रशारण हुने कुरालाई आफ्नो उपलब्धिका रूपमा प्रचार गरेका छन् ।
सबैलाई थाहा छ कि नेपालमा विश्वकपको एकल प्रशारण अधिकार निजी क्षेत्रको हिमालय टेलिभिजनले फिफासँग खरिद गरेको हो । यसका लागि हिमालयले फिफालाई मात्रै ३७ करोड रूपैयाँ तिरेको छ भने सबै लागत जोड्दा ५० करोड पुग्छ । यति ठूलो लगानीको रिकभरीका लागि विज्ञापनबाट मात्रै पर्याप्त नहुने भन्दै हिमालयले दर्शकका लागि १ हजार रूपैयाँ शुल्क निर्धारण गरेको छ । दर्शकले १ हजार रूपैयाँ तिरेपछि विश्वकपका सबै १०४ वटा म्याचहरू हिमालय स्पोर्ट्समार्फत हेर्न सक्छन् ।
प्रतियोगिताको फाइनल भने हिमालय टेलिभिजन (मुख्य च्यानल) मार्फत निशुल्क देखाइने तयारी पहिल्यै थियो । तर, अब एनटीभीबाट पनि निस्शुल्क प्रशारण हुने छ । दर्शकका लागि त यो सुखद नै हो । तर एउटा निजी मिडिया भने अन्यायमा परेको देखिन्छ । उसले महंगो मूल्यमा हासिल गरेको प्रशारण अधिकार प्रतिस्पर्धी च्यानललाई सित्तैमा दिनु परेको छ ।
स्रोतका अनुसार एनटिभीले एक रूपैयाँ पनि नतिरिकन हिमालयबाट विश्वकपका अन्तिम दुई म्याचको प्रशारण अधिकार लिएको हो । यसका लागि सरकारी स्तरबाटै हिमालय टेलिभिजनलाई व्यापक दवाव दिइएको थियो । सुरूमा यत्तिकै दिन नसक्न अडान लिए पनि अन्ततः हिमालयको जोर चलेन । दुई तिहाइको सरकार असन्तुष्ट बनेमा विभिन्न समस्या सिर्जना गरिदिनसक्ने र पछिसम्म सम्बन्ध बिग्रने डरले सम्झौता गर्न बाध्य भएको बुझिएको छ ।
हिमालयले फाइनलका लागि आएका विज्ञापनहरु एनटिभीबाट पनि प्रशारण गरिदिनुपर्ने शर्त अघि सारेको थियो । तर सरकारले त्यो पनि स्वीकार गरेन । यसले गर्दा हिमालयमा विज्ञापनसहित र एनटीभीमा विज्ञापनरहित प्रशारण हुने भएको छ । केही दिनअघि मिडिया हाउसहरूअगाडि (हिमालय टिभीसहित) गाडी तेर्स्याइएको घटनाबाट तर्सिएर पनि यो एकतर्फी सम्झौता गरेको हो कि भन्ने प्रश्न उठेको छ ।
यस विषयमा हिमालय टेलिभिजन व्यवस्थापनसँग कुरा गर्न खोज्दा कसैले पनि प्रतिक्रिया दिन चाहेनन् ।
