कपिलवस्तु । दाङ जिल्लाको तुलसीपुर–४, बनहरीको सामान्य ग्रामीण परिवेशबाट सुरु भएको काशीराम अधिकारीको हस्पिटालिटी करियरको यात्रा अन्तर्राष्ट्रिय होटलहरुको नेतृत्वसम्म पुगेर अहिले नेपालको उदीयमान होटल समूहको नेतृत्वसम्म पुगेको छ । उनी अहिले लुम्बिनी ग्रीन होटल्स एण्ड रिसोट्र्सका प्रमुख कार्यकारी अधिकृत छन् । करिब तीन दशकको व्यावसायिक अनुभव बोकेका अधिकारीले केही वर्षदेखि कपिलवस्तुको चन्द्रौटामा रहेको लुम्बिनी ग्रीन रिसोर्टसहित लमहीको ग्रीन लुम्बिनी होटलको समेत व्यवस्थापकीय नेतृत्व गरेका छन् । रिसोर्टमा क्यासिनो समेत सञ्चालनमा छ । यो समूहले छिट्टै अर्घाखाँचीको नरपानी र भारतको अयोध्यामा पनि होटलको शाखा विस्तार गर्दैछ । लुम्बिनी ग्रीन होटल्स एण्ड रिसोट्र्सका मुख्य लगानीकर्ता लक्ष्मण भण्डारी हुन् ।
गाउँको सपना, विश्वस्तरको अनुभव
वि.सं. २०३४ असार २९ गते जन्मिएका अधिकारीले सन् १९९९ मा भारतको प्रतिष्ठित सरवाना भवन समूहबाट आतिथ्य क्षेत्रमा आफ्नो करिअर सुरु गरेका थिए । चेन्नई, नयाँदिल्ली र भेल्लोरमा काम गर्दै उनले होटल तथा रेष्टुरेण्ट सञ्चालनका आधारभूत सीप, अनुशासन र सेवा संस्कृतिको गहिरो अनुभव हासिल गरे । यही अनुभवले भविष्यमा अन्तर्राष्ट्रियस्तरको नेतृत्वका लागि बलियो आधार तयार गरिदियो ।
व्यावसायिक क्षमताकै आधारमा सन् २००५ मा उनी मलेसियाको वाईटीएल होटल्समा आबद्ध भए । सन् २०१३ सम्मको अवधिमा उनले पाङकोर लाउट रिसोर्ट, द रिट्ज–कार्लटन क्वालालम्पुर र जेडब्लु म्यारियट होटल क्वालालम्पुरजस्ता विश्वस्तरीय होटल तथा रिसोर्टमा नेतृत्वदायी जिम्मेवारी सम्हाले । लक्जरी होटल सञ्चालन, सेवा व्यवस्थापन र बहुसांस्कृतिक कार्य टोलीको नेतृत्व गर्दै उनले अन्तर्राष्ट्रिय आतिथ्य उद्योगको गहिरो अनुभव बटुले । विशेषगरी रिट्ज–कार्लटनको लेडिज एण्ड जेन्टलम्यान सर्भिङ लेडिज एण्ड जेन्टलम्यान भन्ने सेवा दर्शनले उनको नेतृत्व शैलीलाई अझ परिष्कृत बनाएको छ ।
सन् २०१३ को अन्त्यतिर अधिकारी सिंगापुरस्थित केओपी हस्पिटालिटीसँग आबद्ध भए । त्यसपछि इन्डोनेसियाको बाटाम र बालीस्थित मोन्टिगो रिसोट्र्समा उनले रिसोर्ट सञ्चालनको अनुभव लिए । त्यसपश्चात् म्यानमारको ट्रिप बाइ विन्डहाम याङगुनमा नेतृत्वदायी भूमिका निर्वाह गर्दै होटल सञ्चालन, सेवा संस्कृति विकास र आम्दानी व्यवस्थापनमा उल्लेखनीय सफलता हासिल गरे ।
विदेशी अनुभवलाई नेपालमै रूपान्तरण
विदेशमा लामो समय अनुभव सँगालेपछि अधिकारी नेपाल फर्किए । बुटवलस्थित होटल दा फ्लेमिङ्गोको प्रि–ओपनिङ जनरल म्यानेजरका रूपमा उनले होटल सञ्चालनको सम्पूर्ण तयारीदेखि सफल उद्घाटनसम्मको नेतृत्व गरे । त्यसपछि सिद्धार्थ हस्पिटालिटी ग्रुपमा आबद्ध हुँदै सिद्धार्थ होटल नेपालगञ्ज, सिद्धार्थ विलासा भैरहवालगायतका होटलमा जनरल म्यानेजर, क्लस्टर जनरल म्यानेजर तथा प्रि–ओपनिङ जनरल म्यानेजरको जिम्मेवारी सम्हाले । कोहलपुरस्थित होटल सेन्ट्रल प्लाजाका प्रमुख सञ्चालन अधिकृत (सीओओ)का रूपमा पनि उनले संस्थागत पुनर्संरचना र सञ्चालन सुधारमा रणनीतिक भूमिका खेले ।
हाल लुम्बिनी ग्रीन होटल्स एण्ड रिसोट्र्सको नेतृत्व गरिरहेका अधिकारीले सेवा उत्कृष्टता, दक्ष जनशक्ति विकास र दिगो पर्यटन प्रवद्र्धनलाई प्राथमिकतामा राखेका छन् ।
अधिकारीका अनुसार सकारात्मक सोंच, इमान्दारिता र असल चरित्र नै सफल नेतृत्वको दीर्घकालीन आधार हुन् । उनले आफू आबद्ध रहेका संस्थाहरूमा यही सिद्धान्तलाई व्यवस्थापनको मूल आधार बनाउँदै आएको बताउँछन् ।
होटल व्यवस्थापनमा मात्र सीमित नभई अधिकारी प्रशिक्षक र मार्गदर्शकका रूपमा पनि परिचित छन् । उनले युवा होटल व्यवसायी, व्यवस्थापनकर्मी र विद्यार्थीलाई व्यावसायिक दक्षता, सेवा संस्कार र नेतृत्व विकासका विषयमा निरन्तर प्रेरित गर्दै आएका छन् ।
दाङको एउटा सामान्य गाउँबाट सुरु भएको यात्रा आज एसियाका प्रतिष्ठित होटल तथा रिसोर्ट हुँदै नेपालको उदीयमान होटल समूहको नेतृत्वसम्म पुगेको छ । काशीराम अधिकारीको संघर्ष, निरन्तर सिकाइ र व्यावसायिक समर्पणले अवसर खोज्ने युवालाई एउटा स्पष्ट सन्देश दिन्छ–दृढ इच्छाशक्ति, मेहनत र गुणस्तरीय सेवाप्रतिको प्रतिबद्धताले अन्तर्राष्ट्रिय सफलताको ढोका खोल्न सक्छ ।
अधिकारीले नेतृत्व गरेको लुम्बिनी ग्रीन होटल्स एण्ड रिसोट्र्समा हाल १५० बढी कर्मचारी कार्यरत छन् । निर्माणाधीन दुई होटल सञ्चालनमा आउंदा थप कम्तीमा सय जनाले रोजगारी पाउनेछन् ।
मृदुभाषी र सबैलाई सम्मान गर्ने संस्कारका धनी काशिरामको कुशल नेतृत्वमा लुम्बिनी ग्रीन होटल्स एण्ड रिसोट्र्सले हस्पिटालिटी क्षेत्रमा उदियमान प्रोपर्टीको छवि र पहिचानलाई थप उचाईमा पु¥याएको सञ्चालक र लगानीकर्ताहरु बताउँछन् ।
