सुनसरीको कप्तानगञ्ज घटनाको व्यवस्थापन गर्न संयमित ढंगले पहलकदमी नलिने हो भने सामाजिक सद्भाव खल्बलिन सक्छ । एउटा सामान्य घटनाबाट सल्केको हिंसाको प्रभाव देशभर विस्तार हुने जोखिम छ ।
विषय र घटना ठूलो होइन्, बोलबम यात्राका क्रममा डिजे बजाएको विषयमा दुई पक्षबिच भनाभनले उग्र रुप लिँदा सुनसरीको कप्तानगञ्ज तनावग्रस्त भएको छ । प्रहरीको गोली लागेर एक जनाको ज्यान गएको छ । झडपमा नौ सर्वसाधारण र १३ सुरक्षाकर्मीसहित २२ घाइते भएका छन् । घाइते सर्वसाधारणको शरीरको विभिन्न ठाउँमा गोली लागेको छ । अहिले सर्वसाधारण उग्र बन्नुको कारण हो, प्रहरीले मनपरी गोली चलायो । घाइतेको शरीरका विभिन्न ठाउँमा लागेको गोलीले प्रहरीले संयमता गुमाएको देखिन्छ । सुरक्षाकर्मीको काम भीड नियन्त्रण र शान्ति सुरक्षा कायम गर्ने हो । मुख्य जिम्मेवारी पूरा गर्ने शिलशिलामा हुने कमजोरीले कहिलेकाही परिस्थिति नियन्त्रण बाहिर जान सक्छ ।
साउने सोमबारका लागि बोलबम यात्रामा निस्कन लागेको एउटा समूहले डीजे बजाएको विषयमा आइतबार राति करिब ९ बजे दुई पक्षबिच विवाद सुरु भएको थियो । सामान्य भनाभनबाट सुरु भएको विवाद छोटो समयमै उग्र बन्यो । दुवै पक्षबाट लाठी, ढुंगा र भाला प्रहार भएको प्रहरीको भनाइलाई मान्दा प्रदर्शन उग्र भएको छ । भिडले स्थानीयका घर, मेडिकल पसल र सवारीसाधनमा तोडफोड गर्नुका साथै आगजनीको प्रयास भयो । स्थिति भड्किएपछि संयमता अपनाउन सर्वपक्षीय अपील जारी भएको छ ।
सरकारले सुनसरीका सीडीओ र प्रहरी प्रमुखलाई फिर्ता बोलाएर नयाँ व्यक्तिलाई पठाएको छ । सुरक्षा संयोजनको जिम्मेवारी पूरा नगरेको भन्दै कोशीका प्रहरी प्रमुख विनोद घिमिरेलाई फिर्ता बोलाएर शेखर खनाललाई पठाइएको छ । सुरक्षा निकायका प्रमुखहरुको सरुवाले मात्रै समस्या समाधान हुने होइन, त्यो तत्कालको मल्हमपट्टी हुनसक्छ । समस्याको जड समाजमा बढ्दै गएको अराजकता र खल्बलिएको सामाजिक सद्भाव हो । मुुलुकमा बढेको चरम निराशाले पनि सामाजिक एकता खल्बलिएको छ । सरकारले बढ्दो निराशालाई चिर्न विधिमा टेकेर थिति बसाल्न ध्यान दिनुपर्छ । विधिलाई बेवास्ता गर्दा थिति बस्न सक्तैन् । सामाजिक सद्भावका लागि आक्रोश र घृणाको राजनीति होइन्, आपसी मेलमिलाप र हार्दिकताले काम गर्छ । समाजमा घृणाको राजनीति हावी हुँदै जाँदा बिथोलिएको समाजलाई लयमा ल्याउन सहकार्य र मेलमिलापको राजनीतिलाई जोड दिनुपर्छ । राजनैतिक दलबिच चुनावमा प्रतिस्पर्धा र आरोप प्रत्यारोप हुनसक्छ, तर सरकारले अहिले प्रतिशोधपूर्ण ढंगले जुन क्रियाकलाप गरिरहेको छ, त्यसले समाजमा इगो, कुण्ठा र आक्रोश बढाएको छ । अहिलेको इगो, कुण्ठा र आक्रोशलाई त्यागेर सहकार्य र मेलमिलापको बाटोतिर नलाग्ने हो भने समाजमा अझै दरार देखिनेछ ।
यो घटनामा जसरी समाज भड्किएको छ, यो भड्काउका लागि उग्र र अराजक राजनैतिक गतिविधि जिम्मेवार छ । अब विगतका कमजोरी आत्मसात गरौं, समाजमा आक्रोशको आगो बढ्द नदिन सबै मिलेर अघि बढ्न आवश्यक छ । सामाजिक सद्भाव बिथोलिँदा मुलुकले नोक्सानी बाहेक केही पाउँदैन् । सुनसरी घटनाको निष्पक्ष छानबिन गरी आगामी दिनमा यस्ता घटना दोहोरिन नदिनका लागि कार्ययोजना बनाएर अघि बढ्न गृहप्रशासनले पहलकदमी लिनुपर्छ ।
