सुनसरीको देवानगञ्जमा भड्किएको साम्प्रदायिक हिंसा पूर्वी तराई हुँदै पश्चिमतिर फैलिने जोखिम बढ्दै गइरहेका बेला प्रधानमन्त्रीको खोजी भएको छ । संवेदनशील घडीमा सरकार प्रमुखको अपीलले सामाजिक सद्भाव कायम राख्न महत्वपूर्ण भूमिका खेल्ने भएकाले प्रधानमन्त्रीको खोजी हुनु स्वभाविक छ । प्रधानमन्त्री धेरै बोल्नुहुन्न । पहिलेका प्रधानमन्त्री धेरै बोलेकाले काम गर्ने कम बोल्नुपर्छ भन्ने भाष्य खडा गरेर समाजमा साम्प्रदायिक हिंसा भड्किएका बेला सरकार प्रमुखको मौनता गैरजिम्मेवार छ ।
साम्प्रदायिक हिंसा आगोको झिल्को झै हो, जसले ठूलो क्षति गर्न सक्छ । समाजमा नागरिकको मन नजोडिने गरी टुटाउन सक्छ । समाज जोडिने नागरिकको मन मिलेर हो । जब मन आपसमा मिल्दैनन्, त्यसले समाजलाई विभाजित गर्छ । यस्तो संवेदनशील घडीमा प्रधानमन्त्री बालेन्द्र साहको मौनता तोडिनुपर्छ । प्रधानमन्त्रीले संसदलाई बेवास्ता गर्दै आउनु भएको छ । जननिर्वाचित सार्वभौम संसदलाई बेवास्ता गर्नु गैरजिम्मेवार कदम हो । राष्ट्रपतिलाई भेट गरी मुलुकको वस्तुस्थिति र सरकारले चालेका कदमबारे जानकारी गराउनु प्रधानमन्त्रीको नियमित काम हो । तर उहाँलाई राष्ट्रपति भेटेर कुराकानी गर्न अप्ठारो किन लागिरहेको छ ? सुरक्षा प्रमुखले मुलुकको वस्तुस्थितिबारे प्रधानमन्त्रीलाई जानकारी गराउन पाउँदैनन् ।
सचिवालयका सदस्यलाई रिर्पोटिङ गर्नुपर्ने बाध्यता छ । राष्ट्रिय सुरक्षा परिषद्को बैठक बस्ने, मुलुकको सुरक्षा रणनीति बनाउने विषय सरकारको प्राथमिकतामा परेको देखिंदैन । जे गर्नुपर्ने हो त्यही नगर्ने सरकारले के गरिरहेको छ ? सरकार सञ्चालनमा विधिमा टेकेर थिति बसाल्ने भन्दा सचिवालयका सदस्यको मनमौजी चलेको छ । लोकतान्त्रिक प्रणालीलाई व्यवस्थित बनाउने नभई कमजोर पार्ने प्रवृत्ति बढेको छ । सरकार सञ्चालनकै बारेमा राष्ट्रिय स्वतन्त्र पार्टीभित्रै प्रश्न उठिरहेका बेला आगामी दिनमा यो विषयको व्यवस्थापन हुँदै जाला । तर अहिले मुलुकमा साम्प्रदायिक हिंसा भड्काउन कतिपय शक्तिहरुको चलखेल बढिरहेको र मुलुकमा द्वन्द्व चर्के, त्यसले दुरगामी असर गर्ने भएकाले सरकारले पहलकदमी लिनुपर्छ ।
मन्त्रीपरिषद्को बैठक बुधबार बस्यो, त्यो बैठक सुनसरी घटनाबारे मौन रह्यो । संवेदनशील घडीमा अरु नै निर्णय गर्ने, तर गर्नुपर्ने निर्णय नगर्ने प्रवृत्ति गलत छ । प्रधानमन्त्रीको अगुवाइमा सर्वदलीय बैठक बसेर राष्ट्रिय एकताको अपील गर्न ढिलाइ भइरहेको छ । यद्यपी प्रधानमन्त्रीको मौनताकै कारण राष्ट्रिय स्वतन्त्र पार्टीका सभापति रवि लामिछानेको अगुवाइमा सर्वदलीय बैठक बसेर अपील ग¥यो । त्यो अपील प्रधानमन्त्रीबाट आउनुपर्छ । प्रधानमन्त्रीले गर्ने अपीलको बहुआयामिक अर्थ हुन्छ । दलहरुप्रतिको बेवास्ता गरेर अघि बढ्नै सकिन्न भन्ने चेत आएन भने अन्तत्वगत्वा त्यसले सरकारलाई अप्ठारो पार्छ नै बिथोलिएको समाजमा साम्प्रदायिक हिंसा भड्किने जोखिम धेरै छ । अझै समय छ, कार्यशैली सुधार गरौं, भुईतहका समस्या पहिचान गरौं, त्यसपछि मात्रै समस्या समाधानको ढोका खुल्न सक्छ ।
