देवदह । देवदह नगरपालिका–५, वडास्तरीय खेलकुद समितिद्धारा आयोजित टोलस्तरीय खुल्ला महिला साइकल रेस प्रतियोगिता विवादित बनेको छ । समितिले तय गरेको भन्दा अन्य रुट प्रयोग गरेर विजय हासिल गरेको भन्दै विजेतालाई पुरस्कार वितरण नगरेपछि विवाद सुरु भएको हो ।
आयोजक समितिले साइकल रेस सम्पन्न गरी २५ वर्षभन्दा माथिका प्रतियोगिलाई पुरस्कार वितरण गर्न लागिएको अवस्थामा विवाद चुलिएपछि पुरस्कार वितरण कार्यक्रम स्थगित गरेको हो । विजेता घोषणा गरेर पुरस्कार वितरण गर्ने कार्यक्रममा प्रतियोगितामा तृतीय हुने प्रतियोगीलाई पुरस्कार वितरण गरेपनि आयोजकले उक्त पुरस्कार रद्द गरिएको भनेपछि विवाद झन् चर्किएको टोल विकास संस्थाका प्रतिनिधिहरुको भनाइ रहेको छ । अधिकांश टोल विकास संस्थाका प्रतिनिधिहरुले आयोजकले व्यवस्थापन गर्न नसक्दा विवाद भएको बताएका छन् । घुम्तीमा रुट स्पष्ट पार्नको लागि जानकारी दिने मान्छे राख्नु पर्ने भए पनि आयोजकले त्यसो नगरेको र रुट स्पष्ट नभएका कारण विवाद भएको बताएका छन् ।
गौतमबुद्ध राष्ट्रिय उद्यानबाट सुरु भएको टोलस्तरीय खुल्ला महिला साईकल रेस प्रतियोगिता शिवालय टोल, मिलनचोक, शितलनगर, घोडाहाको देवदह दह, हँुदै देवदह नगर अस्पतालमा आएर समापन गरिएको थियो । रुट प्रयोग गरेको वा नगरे भन्ने कुरा आयोजकले पहिल्यै नै व्यवस्थापन गर्नुपर्ने टोल विकास संस्थाका प्रतिनिधिहरुले बताएका छन् । गलत बाटो हुँदै विजेता बन्नेहरुलाई किन पुरस्कार प्रदान गरियो भन्दै टोल विकास संस्थाका प्रतिनिधिहरुले आक्रोस पोखेका थिए । यता देवदह नगरपालिका–५, का वडाध्यक्ष गणेश डुम्रेले आयोजकले तय गरेको रुट प्रयोग नगरेर अन्य बाटो हुँदै गएपछि प्रतियोगिताका विजेताहरुलाई पुरस्कार वितरण नगरेको बताए । समितिले तय गरेको रुट प्रयोग गरेको वा नगरे भन्ने कुरा स्पष्ट रुपमा भिडियो भएको र यस विषयमा टोल विकास संस्थाका प्रतिनिधहरुहरुसँग संयुक्त बैठक बसेर अगाडि बढ्ने र प्रतियोगिताका विजेताहरुलाई पुरस्कार वितरण गर्ने वडाअध्यक्षसँगै ववडास्तरीय खेलकुद समितिको संरक्षक समेत रहेका डुम्रेले जनाए ।
१५ देखि २५ वर्ष र २६ वर्षदेखि माथि गरी दुई समूहमा आयोजित प्रतियोगितामा ६३ जना महिलाहरुले सहभागिता जनाएका थिए । २६ वर्षदेखि माथिको प्रतियोगितामा कोलुवा शान्ति टोलका कोड नम्बर १३१ का तुनीसरा काम्मु प्रथम, बुद्ध टोल विकास संस्थाका कोड नम्बर १३८ का विष्णुमाया पुन द्वितीय र कोलुवा शान्ति टोलका कोड नम्बर १०२ का धनीसरा सिंजाली तृतीय भएका थिए, तर आयोजकले उनीहरुले गलत रुट प्रयोग गरेको भन्दै रद्द गरेका छन् । तर प्रतियोगितामा विजेता भएकाहरुले भने आफूहरुलाइै गाइड गर्नेहरुले जुन रुट देखाएका थिए त्यही बाटो हुँदै गएको बताएका छन् । यसैगरी १५ देखि २५ वर्षकाबिच भएको प्रतियोगितामा संगम पाल्पाली टोल विकासका कोड नम्बर २१३ का स्नेहा सुनार प्रथम, मितेरी टोल विकासका कोड नम्बर २१९ का लिजा कडेल द्वितीय र आर्दश टोल विकासका कोड नम्बर २२८ का श्रया थापा तृतीय भएका छन् ।
उनीहरुलाई जनही एक÷एक वटा लेडिज साइकल र नगद पुरस्कार प्रदान गरिएको छ । वडास्तरीय खेलकुद समितिका अध्यक्ष नविन लुइँटेलको अध्यक्षतामा भएको कार्यक्रममा नगर उप–प्रमुख विद्यालक्ष्मी गुरुङ्ग, वडाध्यक्ष गणेश डुम्रे, वडा नम्बर ९ का वडाध्यक्ष मोहन जिसी, देवदह साइकलिङ्ग क्लबका हरि भण्डारीले बोल्दै साइकल रेस प्रतियोगिताले वातावरण संरक्षणमा टेवा पु¥याउने बताएका थिए ।
