प्रकाश डोटेल
स्याङ्जा
स्याङ्जाको वालिङ नगरपालिकाले ‘कृषि एम्बुलेन्स’ सेवा सञ्चालनमा ल्याएको छ । एम्बलेन्स सेवा सञ्चालनमा आएसँगै स्थानीय कृषकलाई तरकारी, फलफूल तथा कृषि उपज बोकेर बजार धाउनुपर्ने बाध्यताको अन्त्य हुने भएको छ । 

वालिङ नगरपालिका–१ त्रियासीस्थित कृषि उपज बजार व्यवस्थापन सहकारी संस्थालाई कृषि एम्बुलेन्स हस्तान्तरण गरेसँगै कृषकको उत्पादन घर–आँगनबाटै संकलन गरी बजारसम्म पु¥याउने व्यवस्था गरिएको छ । वालिङ नगरपालिका, स्थानीय दियालो संस्था तथा वालिङ कृषि विकास परियोजना (हेफर इन्टरनेसनल नेपाल) को साझेदारीमा सेवा सञ्चालनमा ल्याइएको हो ।

 
कृषि एम्बुलेन्स ३२ लाख ९० हजार रुपैयाँ लागतमा खरिद गरिएको नगरपालिकाले जनाएको छ । नगरपालिकाको १८ लाख ९० हजार र परियोजनाको १४ लाख रुपैयाँ लगानी एम्बलेन्स खरिद गरिएको जानकारी दिँदै नगरपालिकाका प्रमुख प्रशासकीय अधिकृत जीवन ज्ञवालीले सेवा सञ्चालनमा आएपछि कृषिजन्य उत्पादनको संकलन, ढुवानी, भण्डारण र बजारीकरणमा आधुनिक तथा व्यवस्थित बन्ने अपेक्षा गरिएको बताए । 

‘कृषि उत्पादनलाई खेतदेखि बजारसम्म जोड्ने एम्बुलेन्स सेवा कृषकमैत्री कार्यक्रम हो ,’ अधिकृत ज्ञवालीले भने–‘कृषकले उत्पादन, ढुवानी र बिक्रीका लागि बजारीकरणको चिन्ता गर्नुपर्ने अवस्था रहने छैन ।’ हाल सहकारीमार्फत दैनिक करिब ५० क्विन्टल तरकारी संकलन हुँदै आएको छ । कृषि एम्बुलेन्स सञ्चालनमा आएसँगै कृषकको घरबाटै तरकारी उठाइने भएपछि ढुवानी लागत घट्ने, समय बचत हुने र उत्पादित तरकारी ताजा अवस्थामै बजारमा पु¥याइने छ ।

कृषि एम्बुलेन्स सेवा सञ्चालनसँगै उत्पादनदेखि बजारसम्मको कृषि आपूर्ति श्रंखला सुदृढ हुने नगरपालिकाको अपेक्षा रहेको छ । विशेषगरी साना तथा व्यावसायिक कृषकको बजार पहुँच विस्तार गर्दै आम्दानी वृद्धि गर्न महत्वपूर्ण योगदान पुग्नेमा नगरपालिकाले विश्वास जनाएको छ ।

सहकारीका अध्यक्ष अर्जुन प्रकाश अर्यालले ढुवानी अभावका कारण कृषकले वर्षौंदेखि भोग्दै आएको समस्या समाधान हुने जिकिर गरे । ‘पहिले ढुवानी अभावमा खेतबारीमै धेरै तरकारी कुहिन्थ्यो,’ उनले भने–‘बजारसम्म पु¥याउन कठिन थियो । तर अब कृषि एम्बुलेन्समार्फत पोखरा र बुटवलसम्म नियमित रूपमा तरकारी पठाउन सक्ने अवस्था बनेको छ ।’

गएको वर्ष सहकारीले नगर क्षेत्रबाट करिब एक लाख ५८ हजार २६८ किलोग्राम तरकारी संकलन गरेको सहकारीका प्रबन्धक युवराज रेग्मीले बताए । कृषि एम्बुलेन्सले एकै पटक झण्डै १३० क्यारेट तरकारी ढुवानी गर्न सक्ने उनले जानकारी दिए । कृषकलाई ढुवानी लागत घटाउने मात्र होइन, बचत भएको समयले व्यावसायिक खेतीतर्फ थप आकर्षित गर्ने प्रबन्धक रेग्मीले जनाए ।

वालिङ नगरपालिकाले उत्पादित तरकारी तथा फलफूलको न्यूनतम समर्थन मूल्य निर्धारण गर्दै उत्पादनका आधारमा प्रतिकिलो ५ रुपैयाँ अनुदान उपलब्ध गराउँदै आएको जनाएको छ । गएको आर्थिक वर्ष २०८२-८३ मा नगरपालिकाले ७ लाख ९१ हजार ३४२ रुपैयाँ तरकारी अनुदानमा कृषकलाई नगद वितरण गरेको थियो ।