तिलोत्तमा । पछिल्लो समय आम नागरिकमा देखिने तनावको समस्य कम गराई स्वस्थ समाज बनाउने उद्देश्यले तिलोत्तमा ८ मा तनाव व्यवस्थापन प्रशिक्षण सम्पन्न भएको छ ।
संगम टोल विकास संस्थाको आयोजना र संगम दिदी बहिनी समूहको सहआयोजनामा कार्यक्रम भएको हो । कार्यक्रममा मानव सेवा आश्रमका संस्थापक अध्यक्ष रामजी अधिकारीले व्यक्तिमा तनाव कम गराउने सम्बन्धी प्रशिक्षण दिएका छन् ।
प्रशिक्षक अधिकारीले हरेक परिवारका सबै सदस्यले बिहानमा नियमित योगा तथा शारीरिक व्यायाम गर्ने, सन्तुलित खानपान र पर्याप्त पानी पिउने, सकारात्मक सोच र व्यवहार गर्ने, मदिरा, धूम्रपान जस्ता स्वास्थयलाई हानि गर्ने पदार्थ सेवन गर्न नगर्ने हो भने तनाव स्वतः कम हुने बताए ।
तिलोत्तमा नगरपालिकाका प्रमुख रामकृष्ण खांणले रिसका कारण तनाव उत्पन्न हुने भएकाले कोही पनि रिसाउन नहुने सुझाव दिए । नगर प्रमुख खांणले तिलोत्तमा नगरवासीहरु कोही पनि रिसाउन नहुनेमा जोड दिए । रिसका कारण नै परिवार र समाजमा झगडा तथा विवादहरु हुने र त्यसले तनाव सिर्जना गर्ने भएकाले रिसलाई नियन्त्रण गर्नु नै तनावको सही उपचार हुने स्पष्ट पारे । नगरलाई मानवताको नगर बनाउन पनि तनाव व्यवस्थापन जरुरी हुने उनले बताए ।
तिलोत्तमा ८ का वडाध्यक्ष कृष्ण पौडेलले पछिल्लो समय घर घरमा विभिन्न कारणले तनावको समस्या देखिएको बेला टोल विकास र संस्था र दिदी बहिनी समूहले टोलवासीका लागि तनाव व्यवस्थापन प्रशिक्षण आयोजना गर्नु ज्यादै सकारात्मक रहेको भन्दै कार्यक्रम आयोजनाको खर्च नगरपालिकाले व्यवस्थापन गर्ने बताए ।
नगर प्रमुख खांणले समेत कार्यक्रमको खर्चको भार टोल विकास संस्थालाई नपार्ने प्रतिवद्धता जनाए ।
कार्यक्रममा टोल विकास संस्थाका अध्यक्ष बाबुराम खरेल, उपाध्यक्ष संगिता घिमिरे, सचिव जिवराज न्यौपाने, संगम दिदी बहिनी समूहकी सचिव गिता शर्मा लगायतले टोलवासीको माग अनुसार विभिन्न रचनात्मक र सामाजिक कार्यक्रमहरु गर्दै आएको र भविष्यमा पनि निरन्तरता दिने बताउनुभएको थियो ।
कार्यक्रममा टोलवासीहरुको उत्साहजनक उपस्थिति रहेको थियो ।
समाजमा गरिबी, बेरोजगारी, परिवारमा न्यून आम्दानी तर महँगीका कारण खर्च बढी, घरायसी विवाद, सम्बन्धमा समस्या, कामको बोझ,पर्याप्त निद्रा नहुनु जस्ता कारणले व्यक्तिमा तनावको समस्या हुने चिकित्सकहरुको भनाई छ ।
