पाल्पा । दक्षिण कोरियामा आयोजना भएको ’प्रथम पाल्पा रानीमहल भलिबल कप २०२६’ को उपाधि गुल्मी सम्पर्क समिति दक्षिण कोरियाले चुम्न सफल भएको छ ।
’नमस्ते पाल्पा परिवार दक्षिण कोरिया’ को आयोजनामा आइतबार कोरियाको सुवोन शहरमा सम्पन्न भएको उक्त प्रतियोगिताको फाइनल खेलमा २७ समुहलाई पछि पार्दै गुल्मी सम्पर्क समितिले उपाधी जित्न सफल भएको हो ।
विजेता गुल्मी सम्पर्क समिति दक्षिण कोरियाले २२ लाख कोरियन वन (नगद), ट्रफी, मेडल र प्रमाणपत्र हात पारेका छ । यसै गरी उपविजेता सुदूरपश्चिम समाज दक्षिण कोरियाले १२ लाख कोरियन वन नगद ट्रफी, मेडल र प्रमाणपत्र पुरस्कार हात पारेका छ ।
यसैगरी सान्त्वना स्थानमा स्याङ्जा टोली दक्षिण कोरिया र विश्वकर्मा टोली दक्षिण कोरियाले नगद पाँच पाँच लाख कोरियन वन ट्रफी, मेडल र प्रमाणपत्र पुरस्कार हात पारेका छन ।
प्रतियोगितामा व्यक्तिगत विधातातर्फ पनि खेलाडीहरूको मनोबल बढाउन आकर्षक नगद र प्रमाणपत्रबाट पुरस्कृत गरिएको थियो । प्रतियोगितामा उत्कृष्ट खेलाडीको रुपमा शिसिर विश्वकर्माले १ लाख कोरियन वन र प्रमाणपत्र हात पारेका छन भने उत्कृष्ट स्पाइकरमा भरत रानाले ५० हजार कोरियन वन र प्रमाणपत्र पुरस्कार पाएका छन ।
यसैगरी प्रतियोगितामा चन्द्र भण्डारीले उत्कृष्ट सेटरको उपाधी सहित ५० हजार कोरियन वन र प्रमाणपत्र पुरस्कार हात पारेका छन । उत्कृष्ट डिफेन्डरमा रविन दाहालले ५० हजार कोरियन वन र प्रमाणपत्र पुरस्कार पाएका छन ।
उत्कृष्ट ब्लकरमा पर्वत पुनले ५० हजार कोरियन वन र प्रमाणपत्र पुरस्कार हात पारेका हुन । प्रतियोगितामा विजेता, उप विजेता सान्तवना तथा उत्कृष्ट खेलाडी तथा सहभागी टिमहरुलाई नगद पुरस्कार, ट्रफी, मेडल तथा प्रमाणपत्रबाट सम्मान गरिएको थियो ।
प्रतियोगितामा दक्षिण कोरियाभरि रहेका नेपाली विभिन्न संघ–संस्था तथा क्षेत्रबाट गरी कूल २८ वटा टोलीहरूले सहभागिता जनाएका थिए । खेलाडीहरूको अनुशासित र प्रतिस्पर्धात्मक खेल प्रदर्शनसँगै कोरियामा रहेका नेपाली दर्शकहरूको उपस्थिति रहेको थियो । आ आफ्नो टिमका दर्शकहरूको हुटिङ र उत्साहले प्रतियोगितालाई रोचक बनाएको थियो ।
’खेलकुदबाट एकता, एकता नै हाम्रो राष्ट्रियता’ भन्ने मूल नाराका साथ आयोजित यस प्रतियोगिताले दक्षिण कोरियामा बसोबास गरिरहेका नेपाली समुदायलाई खेलकुदका माध्यमबाट एकताबद्ध बनाउनुका साथै आपसी भ्रातृत्व, सद्भाव र सहकार्यलाई अझ मजबुत बनाउने उद्देश्यले प्रतियोगिता आयोजना गरेको ’नमस्ते पाल्पा परिवार दक्षिण कोरियाका अध्यक्ष मदन कुमार थापाले बताए ।
आयोजक संस्था ’नमस्ते पाल्पा परिवार दक्षिण कोरिया’ प्रतियोगितालाई सभ्य र भव्य बनाउन सहयोग गर्ने सबैप्रति हार्दिक आभार व्यक्त गरेको छ ।
यस्ता खेलकुद प्रतियोगिताले दक्षिण कोरियामा कार्यरत तथा अध्ययनरत नेपाली समुदायबीच कार्यव्यस्तताका बाबजुद खेलकुदको माध्यमबाट सम्बन्ध विस्तार गर्न, भावनात्मक एकता कायम राख्न र आपसी सहयोगको भावना बढाउन अत्यन्त महत्त्वपूर्ण योगदान पु¥याएको आयोजक संस्थाका प्रमुख सल्लाहकार राजु रसालीले बताए ।
आगामी दिनहरूमा पनि यस्ता रचनात्मक र खेलकुद सम्बन्धी कार्यक्रमहरूलाई निरन्तरता दिइने आयोजकले जनाएको छ ।
