गुल्मी
जिल्ला प्रशासन कार्यालय गुल्मीको नेतृत्वमा इस्मा गाउँपालिकामा अवैध रूपमा सञ्चालित दुई वटा निजी मेडिकलमा ताला लगाई सिल गरिएको छ । प्रशासनको टोलीले छापा मार्दा इस्मा गाउँपालिका–२ छल्दीटारस्थित राम मेडिकल हल र वडा नं १ हर्पुकोटमा सञ्चालित आलम मेडिकल अवैध रुपमा सञ्चालित भेटिएका प्रशासनले जनाएको छ ।
राम मेडिकल हल ( छल्दीटार ) तम्घासको वैधानिक मेडिकलको शाखाका रूपमा सञ्चालन गरिएको भनिए पनि कुनै कानुनी मापदण्ड पूरा नगरेकाले सिल गरिएको छ । यसका सञ्चालक इस्मा गाउँपालिकामै कार्यरत छैटौँ तहका अहेव रमेश मरासिनी हुन् ।
आलम मेडिकल ( हर्पुकोट ) को कुनै इजाजत र मापदण्डविना सञ्चालनमा रहेको यो मेडिकल पनि प्रशासनले बन्द गराएको छ । यसका सञ्चालक हस्तिचौर स्वास्थ्य चौकीका प्रमुख सम्सुल हक मिया हुन् ।
हस्तिचौर स्वास्थ्य चौकीका प्रमुख सम्सुल हक मिया विक्रम संवत् २०५६ सालदेखि इस्मामा कार्यरत छन् । केही महिना इस्मा गाउँपालिकाको निमित्त प्रमुख प्रशासकीय अधिकृतसम्म बनेका मियालाई माथिल्लो तहको राजनीतिक पहुँच र जनप्रतिनिधिको संरक्षणका कारण लामो समयसम्म एउटै ठाउँमा टिकाइराखिएको स्थानीयको आरोप छ ।
सरकारी कर्मचारीले नै अवैध धन्दा चलाएको उजुरी परेपछि जिल्ला प्रशासन कार्यालय गुल्मीबाट खटिएको टोलीले यो कारबाही गरेको हो । कानुनी प्रक्रिया पूरा नगरी सञ्चालन गरिएका यी दुवै मेडिकल बन्द गराई सञ्चालकहरूमाथि थप कारबाही प्रक्रिया अगाडि बढाइएको जिल्ला प्रशासनका प्रशासकीय अधिकृत कमल सेनले बताए ।
