बुटवल । बुटवल अटो इन्जिनियरिङ एशोसियसन रुपन्देहीले हालै आएको विनाशकारी बाढीबाट प्रभावित नागरिकको राहत तथा उद्धारका लागि प्रधानमन्त्री राहत कोषमा २ लाख ५१ हजार ५ सय ५५ रुपैयाँ सहयोग गरेको छ।
एशोसियसनका अध्यक्ष प्रेम गौचनले बाढीबाट ठूलो जनधनको क्षति भएको दुःखद् अवस्थामा पीडितको सहयोगका लागि संस्थाको तर्फबाट उक्त रकम प्रधानमन्त्री राहत कोषमा प्रदान गरिएको बताए।
भोटेकोशी क्षेत्रमा आएको बाढीका कारण रसुवालगायतका विभिन्न क्षेत्रमा ठूलो क्षति पुगेको तथा धेरै नागरिकको ज्यान गएको र केही अझै सम्पर्कविहीन रहेको अवस्थामा एशोसियसनले मानवीय सहयोग गरेको हो।
यसैगरी, एशोसियसनले भदौ ११ गते बिहीबार साँझ दीप प्रज्वलनसमेत गरेको थियो। उद्योग उपाध्यक्ष ध्रुवराज भुसालले बाढीमा परी ज्यान गुमाएकाहरूको चिरशान्तिको कामना गर्दै दीप प्रज्वलन गरी हार्दिक श्रद्धाञ्जली अर्पण गरिएको बताए। उनले घाइतेहरूको शीघ्र स्वास्थ्यलाभको कामनासमेत गरिएको जानकारी दिए।
एशोसियसनले विपद्को यस दुःखद् घडीमा प्रभावित परिवारप्रति ऐक्यबद्धता जनाउँदै राहत तथा मानवीय सहयोगमा आफ्नो तर्फबाट योगदान गरेको जनाएको छ।
