बुटवल । रसुवाको भोटेकोसीमा आएको भीषण बाढीबाट प्रभावित नागरिकका लागि तिलोत्तमा सिर्जनशील समाजले करिब १७ लाख रुपैयाँ बराबरको राहत सामग्री संकलन गरी वितरणका लागि धादिङतर्फ पठाएको छ ।
समाजले स्थानीय टोल विकास संस्था, आमा समूह तथा थ्री सिस्टर कलेक्सन बुटवललगायतको सहकार्यमा तीन दिनसम्म राहत सामग्री संकलन गरेको हो । संकलन गरिएको राहतमा चामल, दाल, तेल, सोयाबिन, बेसार तथा विभिन्न मसला, चाउचाउ, बिस्कुट, कपडा, भाँडाकुँडा र मेडिकल सामग्रीलगायत छन् । संकलित राहत सामग्री धादिङको गजुरी गाउँपालिका–१, २ र ६ का बाढी प्रभावितलाई वितरण गरिने राहत सामग्री संकलन संयोजक एवं समाजका वरिष्ठ उपाध्यक्ष पदमबहादुर पौडेल क्षेत्रीले जानकारी दिए । उनका अनुसार करिब १७ लाख रुपैयाँ बराबरको राहत सामग्री तीनवटा बोलेरो गाडीमा धादिङ लगिएको हो । उक्त सामग्री करिब ३०० जना प्रभावितलाई वितरण गरिनेछ ।
राहत सामग्री लिएर तिलोत्तमा सिर्जनशील समाजका अध्यक्ष सन्तोष बर्मा केसी, वरिष्ठ उपाध्यक्ष पदमबहादुर पौडेल क्षेत्री, सुभाष थापासहित ६ जनाको टोली बुधबार बिहान धादिङतर्फ प्रस्थान गरेको हो ।
टोलीलाई तिलोत्तमा नगरपालिकाका प्रमुख रामकृष्ण खाँण, उप–प्रमुख जगेश्वरदेवी चौधरी, तिलोत्तमा–४ का वडाध्यक्ष तथा स्थानीय बासिन्दाले बिदाइ गरेका थिए ।
बिदाइ कार्यक्रममा नगर प्रमुख खाँणले देशको जुनसुकै स्थानमा विपद् आइपर्दा पीडितको सहयोगमा तिलोत्तमा नगरपालिका र नगरवासी सधैँ अग्रसर रहने बताए । उनले राहत सामग्री ढुवानीमा लाग्ने खर्च नगरपालिकाले व्यहोर्ने प्रतिबद्धता समेत व्यक्त गरे ।
उपप्रमुख चौधरीले भोटेकोसीमा आएको बाढीबाट उत्पन्न महाविपत्तिको सामना सबै मिलेर गर्नुपर्ने बताइन् । विपद्का बेला आ–आफ्नो ठाउँबाट सक्दो सहयोग गर्नुपर्नेमा उनले जोड दिइन् ।
२०७४ सालमा स्थापना भएको तिलोत्तमा सिर्जनशील समाजले सामाजिक तथा मानवीय सेवाका क्षेत्रमा विभिन्न गतिविधि गर्दै आएको जनाएको छ ।
