बुटवल । नेपाल आयल निगम भलवारी डिपो, रूपन्देही आउँदै गरेका ट्याङ्करबाट पेट्रोलियम पदार्थ चोरी गर्दै गरेको अवस्थामा प्रहरीले एक जना नियन्त्रणमा लिएको छ । लुम्बिनी प्रदेश प्रहरी कार्यालय दाङबाट खटिएको टोलीले मंगलबार भैरहवास्थित सराफ आयल सेन्टरमा पेट्रोलियम पदार्थ निकालिरहेको अवस्थामा दुईवटा ट्याङकरसहित सहचालकलाई नियन्त्रणमा लिएको हो ।
जिल्ला प्रहरी कार्यालय, रूपन्देहीका निमित्त सूचना अधिकारी प्रहरी निरीक्षक (इन्स्पेक्टर) आशिष विश्वकर्माका अनुसार भलवारी डिपोका लागि भारतबाट पेट्रोलियम पदार्थ बोकेर आएका ट्याङ्कर सराफ आयल सेन्टरमा पुगेका थिए । प्रहरीले छापा मार्दा लु २ ख १५४४ र लु १ ख ६५०४ नम्बरका ट्याङ्करबाट तेल निकालिरहेको पाइएको थियो ।
दुवै ट्याङ्करको सिल तोडिएको र पेट्रोलियम पदार्थ निकालिएको पाइएको प्रहरीले जनाएको छ । ‘प्रदेश प्रहरी र जिल्लाको संयुक्त टोलीले उनलाई नियन्त्रणमा लिएको हो,’ विश्वकर्माले भने, ‘केही लिटर तेल झिकिसकेको पाइएको छ ।’ भलवारी डिपोका लागि पेट्रोलियम पदार्थ ढुवानी गर्ने ट्याङ्करबाट यसअघि पनि तेल चोरीका घटना हुने गरेको थियो ।
भारतबाट पेट्रोलियम पदार्थ ढुवानी गर्ने ट्याङ्कर व्यवसायी र पेट्रोल पम्प सञ्चालकबीचको मिलेमतोमा लामो समयदेखि तेल चोरी हुने दाबी गरिएको छ ।
