काठमाडौं । सरकारले पृथ्वी राजमार्गअन्तर्गतको कृष्णभिरमा हुने पहिरो तथा सडक अवरोधको दीर्घकालीन समाधानका लागि सुरुङ वा भायोडक्ट (पिल्लरमाथि पुलजस्तो संरचना बनाएर सडक लैजाने प्रविधि) निर्माण गर्ने विकल्पमा अध्ययन सुरु गरेको छ ।
सडक विभागका महानिर्देशक डा. विजय जैशीले सोमबार पूर्वाधार विकास समितिको बैठकमा दिएको जानकारीअनुसार कृष्णभिरको समस्याको दीर्घकालीन समाधानका दुई विकल्पमा प्राविधिक अध्ययन अघि बढाइएको छ ।
उनका अनुसार कृष्णभिर क्षेत्रमा सुरुङ निर्माण गर्ने वा अगाडितिर भायोडक्ट बनाएर सडक जोड्ने दुई विकल्पमा अध्ययन भइरहेको छ । त्यसका लागि प्राविधिक अध्ययन सुरु भइसकेको र करिब दुई महिनाभित्र प्राविधिक प्रतिवेदन तयार हुने उनले बताए ।
प्राविधिक प्रतिवेदन आएपछि निर्माणका लागि ठेक्का प्रक्रियामा जाने विभागको तयारी छ ।
‘कृष्णभिरमा लङटर्मको लागि यसको भित्रबाट टनेल खन्ने अथवा अगाडितिर भायोडक्ट बनाएर जोड्ने गरेर स्टडी सुरु भइसकेको छ,’ जैशीले समितिमा भने, ‘दुई महिनाजतिमा टेक्निकल रिपोर्ट आउँछ । त्यसपछि हामी ठेक्कामा जान्छौं ।’
कृष्णभिरमा पटक–पटक पहिरो जाँदा पृथ्वी राजमार्गमा यातायात प्रभावित हुँदै आएको छ । पछिल्लो समय गत भदौ १० गतेको भोटेकोशी–रसुवा बाढीको प्रभावले साविकको सडकको भाग भत्किएको छ । भदौ १४ गते कृष्णभिर खण्डको सडक भत्किएको थियो ।
तत्कालका लागि भत्किएको सडकको माथितिरबाट ट्र्याक खोलेर सवारी साधन आउ–जाउको व्यवस्था मिलाइएको छ । तत्कालीन समस्या समाधानसँगै दीर्घकालीन रूपमा जोखिम कम गर्ने गरी विभागले वैकल्पिक सडक निर्माणको कामसमेत अघि बढाएको जैशीले जानकारी दिए ।
उनका अनुसार फिस्लिङ र बेनिघाटतर्फ पुल पारिपारि सडक लैजाने वैकल्पिक मार्ग निर्माणको काम पनि सुरु भइसकेको छ । फिस्लिङतर्फ करिब १।५ किलोमिटर भिर काट्ने काम सुरु भएको उनले बताए ।
उक्त वैकल्पिक सडक तयार भएपछि पृथ्वी राजमार्गको मुख्य खण्डमा समस्या आए पनि वैकल्पिक मार्गबाट यातायात सञ्चालन गर्न सकिने विभागको अपेक्षा छ ।
‘साढे एक किलोमिटर फिस्लिङतिर भिर काट्ने काम सुरु भइसकेको छ,’ जैशीले भने, ‘यो भिर काटिसकेपछि यो राजमार्गले धेरै दुस्ख दियो भने एकदमै छिटो चलाउन सकिने भएर काम भइरहेको छ ।’
