भुवन पाण्डे
रूपन्देही
रुपन्देहीको सियारी गाउँपालिका–३ लक्ष्मीपुरमा करिब ३० लाख रुपैयाँ लागतमा निर्माण गरिएको आरसीसी सडक तीन महिना नपुग्दै बिग्रिएको छ । सडक बिग्रिएपछि निर्माणको गुणस्तरमाथि प्रश्न उठेको छ ।
गाउँपालिकाको बजेटमा प्रिमियम कन्स्ट्रक्सन, काठमाडौंले सडक निर्माण गरेको हो । सडक गत वैशाखको दोस्रो सातातिर निर्माण गरिएको हो । सडक दुई खण्डमा बनाइएको छ । एउटा खण्ड ७५ मिटर र अर्को ९० मिटरको छ । ९० मिटरको खण्ड सामान्य अवस्थामा छ । तर, ७५ मिटरको खण्ड भने ठाउँ–ठाउँमा बिग्रिएको छ ।
सडकको माथिल्लो सिमेन्टको सतह उप्किएको छ । सतह उप्किएपछि तलको गिट्टी अर्थात् मिस्कट देखिएको छ । कतिपय ठाउँमा कोट्याउँदा गिट्टीसमेत निस्किने अवस्था छ । सडक बिग्रिएको जानकारी दुई महिनादेखि गराए पनि सम्बन्धित निकायले कुनै पहल नगरेको स्थानीयहरुको आरोप छ । स्थानीय सोमनाथ यादवका अनुसार सडक निर्माणकै क्रममा गुणस्तरबारे प्रश्न उठाइएको थियो । स्थानीयले गाउँपालिकालाई समेत यसबारे जानकारी गराएका थिए । स्थानीय रामभरत कुर्मीले सडकको केही भागमा गिट्टी राम्रोसँग नजमेको बताए । उनका अनुसार सडक निर्माण भएको छोटो समयमै समस्या देखिन थालेको हो । सडक निर्माणका क्रममा स्थानीयले आधार संरचना, कंक्रिटको गुणस्तर र स्लाबको मोटाइबारे प्रश्न उठाएका थिए ।
त्यसबेला गाउँपालिकाले गुणस्तर परीक्षणपछि मात्र अन्तिम भुक्तानी गर्ने बताएको थियो । तर, स्थानीयले भने आवश्यक गुणस्तर परीक्षण नभएको आरोप लगाएका छन् । स्थानीय सुभास कुर्मीले सडक निर्माणको गुणस्तरबारे प्राविधिक परीक्षण हुनुपर्ने बताए । उनका अनुसार सडक यति छोटो समयमा बिग्रनुको कारण पत्ता लगाउन आवश्यक छ ।
सडक बिग्रिएको दुई महिनापछि बल्ल गाउँपालिकाले निर्माण कम्पनीलाई मर्मतका लागि पत्र पठाएको छ । निर्माण कम्पनीको मर्मतसम्भारको जिम्मेवारी अवधि अझै बाँकी छ । सियारी गाउँपालिकाका इञ्जिनियर दिलिप भट्टराईले सडक मर्मत निर्माण कम्पनीले नै गर्ने बताए । उनका अनुसार निर्माण कम्पनीलाई आवश्यक प्रक्रिया पूरा गरी मर्मत गर्न भनिएको छ । तर, स्थानीय मर्मत गरेर मात्र समस्या समाधान हुनेमा विश्वस्त छैनन् । सडक किन यति छिट्टै बिग्रियो भन्ने विषयमा प्राविधिक परीक्षण हुनुपर्ने उनीहरूको माग छ ।
कंक्रिटमा प्रयोग भएको सिमेन्ट, बालुवा र गिट्टीको अनुपात परीक्षण गर्नुपर्ने उनीहरू बताउँछन् । स्लाबको मोटाइ पनि मापदण्डअनुसार भए–नभएको जाँच गर्नुपर्ने उनीहरूको माग छ । त्यस्तै, सडकको सब–बेस र बेस राम्रोसँग कम्प्याक्ट गरिएको थियो कि थिएन भन्ने पनि परीक्षण गर्नुपर्ने स्थानीयको भनाइ छ । कंक्रिट राखेपछि आवश्यक क्युरिङ गरिएको थियो कि थिएन भन्ने विषय पनि जाँच गर्नुपर्ने उनीहरूको माग छ ।
यो सडक एम–१५ ग्रेडको आरसीसी कंक्रिट प्रयोग गरेर निर्माण गरिएको गाउँपालिकाले जनाएको छ । इञ्जिनियर भट्टराईले कंक्रिटको गुणस्तर र मजबुती परीक्षण गरेर मात्र काम अघि बढाइएको दाबी गरेका छन् ।
