बुटवल । बाढी पहिरो लगायत प्राकृतिक विपत्तिका कारण रगतको अभाव हुन सक्ने अवस्थालाई मध्यनजर गर्दै उद्योग व्यापार संघ बुटवलले रक्तदान कार्यक्रम सम्पन्न गरेको छ ।
रक्त सञ्चार केन्द्र बुटवलमा भएको रक्तदानमा संघका पदाधिकारी, कार्यसमिति सदस्य, साधारण सदस्य, सल्लाहकार र संघका शुभेच्छुकहरु समेत गरी ७९ जनाले रक्तदान गरी ७९ पिन्ट रगत संकलन भएको छ ।
रक्तदान कार्यक्रमको उद्घाटन गर्दै संघका अध्यक्ष लोकनाथ पन्थीले संघले संस्थागत सामाजिक उत्तरदायित्व वहन गर्दै रगतको अभावमा कसैको उपचार प्रभावित नहोस् र कसैले ज्यान गुमाउन नपरोस् भन्ने पवित्र उद्देश्यले रक्तदान कार्यक्रम गरिएको बताए ।
रक्तदान कार्यक्रमको संयोजन संस्थाका केशव पौडेलले गरेका वरिष्ठ उपाध्यक्ष पदम जीसीले जानकारी दिए । संघका महासचिव विजय आचार्यले स्वस्थ मानिसले हरेक ३ महिनाको अन्तरालमा रक्तदान गर्र्दा स्वास्थ्यलाई राम्रो हुने बताए ।
नेपाल उद्योग व्यापार महासंघका केन्द्रीय अध्यक्ष खिमनारायण पराजुलीको प्रमुख आतिथ्यतामा भएको कार्यक्रममा संघका निवर्तमान अध्यक्ष विष्णुप्रसाद पाण्डे,संघका उद्योग उपाध्यक्ष केशव श्रीस, बाणिज्य उपााध्यक्ष यमलाल मरासिनी लगायत पदाधिकारी र कार्यसमिति सदस्यहरुको उपस्थिति रहेको संघका सचिव सौरभ भुसालले जानकारी दिए ।
