तिलोत्तमा । कोलीय देवदह वचत तथा ऋण सहकारी संस्थाको एकाई–६ देउराली सेवा केन्द्र स्तरीय २१ औं साधारण सभा सम्पन्न भएको छ ।
शनिबार तिलोत्तमा ८ प्रदीपनगरस्थित करहिया सामुदायिक वनको सभाहलमा साधारण सभा सम्पन्न भएको हो । साधारण सभाले विभिन्न १२ वटा प्रस्ताव पारित गरेको छ ।
सभामा देउराली सेवा केन्द्रका संयोजक एवं सहकारी संस्था सञ्चालक समितिका सदस्य बाबुराम अर्याले संस्थाको वार्षिक प्रतिवेदनबारे जानकारी गराएका थिए । अर्यालले संस्थामा अहिले २० हजारभन्दा बढी शेयर सदस्य, ३ हजारभन्दा बढी बाल बचतकर्ता रहेका र गत आर्थिक वर्षमा मात्रै १ हजार १८२ जना शेयर सदस्य थपिएपछि संस्थाका शेयर सदस्यको संख्या २० हजार ७३१ पुगेको बताए ।
चालु आर्थिक वर्षमा थप ८ सय सदस्य वृद्धि गर्ने लक्ष्य राखिएको र देउराली सेवा केन्द्रमा मात्रै ११ सय ६१ जना सदस्य आवद्ध रहेको अर्यालले जानकारी दिए ।
सेवा केन्द्रका उपसमिति सदस्य केशवराज अर्यालले स्वागत गर्दै संस्थाका सेवालाई थप सहज, सरल प्रविधिमैत्री बनाउन पर्ने सुझाव दिए । साधारणसभामा तिलोत्तमा ८ का वडाध्यक्ष एवं सहकारीका सदस्य कृष्णप्रसाद पौडेल,तिलोत्तमा ११ का वडाध्यक्ष एवं सहकारीका सदस्य विष्णु बराल,सल्लाहकार विष्णुप्रसाद पौडेल,सल्लाहकार इश्वरीप्रसाद शर्माले शुभकामना मन्तव्य व्यक्र गरेका थिए ।
साधारणसभामा संस्थाका शेयर सदस्य रहेका जेष्ठ नागरिकलाई सम्मान गरिएको थियो । कार्यक्रमको सञ्चालन देउराली सेवा केन्द्र इन्चार्ज मुना भण्डारीले गरेकी थिइन् । शनिबार सहकारीका ९ वटै सेवा केन्द्रले संस्थाको २१ औं साधारण सभा सम्पन्न गरेका र प्रतिनिधिमूलक मूल घोषणासभा असोज २४ गते देवदहमा हुने संस्थाका व्यवस्थापक विनोद पराजुलीले जानकारी दिए ।
