राष्ट्रिय स्वतन्त्र पार्टी (रास्वपा)का सांसद खगेन्द्र सुनारको सार्वजनिक भएको अडियो सभ्य समाजका लागि घिनालाग्दो, मानवताविरोधी र बर्बर छ । टेलिफोनमार्फत् महिलामाथि दुव्र्यवहार गरेको यो अडियोले सुनारप्रतिमात्र नभई  राजनैतिक नेतृत्वमाथि केही प्रश्न उब्जेका छन् । ती प्रश्नको निवारण गर्ने काम सरकार, संसद, राष्ट्रिय स्वतन्त्र पार्टी र स्वंय सुनारको हो ।
खगेन्द्र सुनार विवादित पात्र हुन् । बालेन क्रेजमा चुनाव जितेका मात्र नभई यी ‘भाइरल’ पात्रलाई खडा गर्दा चुनावमा मत तान्न सकिन्छ भन्ने आकलन गरेर राष्ट्रिय स्वतन्त्र पार्टीले उनलाई उम्मेदवार बनाएको हो । दुवैको स्वार्थ मिल्दा सुनार उम्मेदवार भए, चुनाव जिते । चुनाव जितेपछि उनले जुन परिपक्कता र जिम्मेवारी पूरा गर्नुपर्दथ्यो, गरेनन् । तथ्यका आधारमा विषयवस्तु उठाउनुको साटो स्वार्थका आधारमा विवादित विषयवस्तु उठाएर अरुको मानमर्दन गर्ने काम भएका छन् ।

ती घटनाक्रम चलिरहदा उनको सार्वजनिक भएको अडियो र विषयवस्तुमाथि जुन खालका प्रश्न उठेका छन्, ती प्रश्नको उत्तर दिएर जनप्रतिनिधिलाई जवाफदेही बनाउनुपर्छ । राष्ट्रिय स्वतन्त्र पार्टीले छानबिन अघि बढाएको छ । छानबिन पूरा नहुञ्जेल सार्वजनिक हैसियतमा कुनै पनि कार्यक्रममा सहभागी नहुन पार्टीले निर्देशन दिएको छ । राष्ट्रिय स्वतन्त्र पार्टीले प्रारम्भिक चरणमा गरेको यो निर्णय सकारात्मक छ । अब पालो सरकारको हो । एक जना सांसदले महिला हिंसा, यौन दुव्र्यवहार गरेको अडियो सार्वजनिक भएपछि तत्काल छानबिन गर्नुपर्दछ । संसदले पनि महिला हिंसा जस्तो संवेदनशील विषयमा आरोप लागिसकेपछि छानबिनमा ढिलाई गर्न हुन्न । सत्ताको प्रयोग गरी चोख्याउने ढंगले होइन्, निष्पक्ष छानबिन गर्दा सरकारप्रति भरोसा र विश्वास बढ्छ । गृहमन्त्री सुदन गुरूङले राजिनामा दिएपछि छानबिन गरी जुन ढंगले चोख्याएर पुनः गृहमन्त्री नियुक्त गरियो, त्यसैगरी, चोख्याउने काम हुनुहुँदैन  । अहिले राजनीतिले शुद्धिकरण खोजेको छ । सत्ता निकटका पात्रहरु गंभीर अभियोग लाग्दा समेत कानुनी कारबाही नहुने प्रवृतिले आम नागरिकमा निराशा छ । कानुन कसैलाई लागु हुने र कसैलाई लागु नहुने प्रवृत्ति अन्त्य गर्नका लागि समेत यो घटना एउटा महत्वपूर्ण अवसर हो ।

अडियो सत्य हो, होइन् पहिले त्यसको छानबिन हुनुपर्छ । अडियोमा बोलेको अशिष्ट र अश्लिल शब्द एक जना महिलालाई किन बोलियो ? एक जना महिलालाई कुट्ने, पिट्ने भन्दै धम्क्याइएको छ । अडियो सुन्दा महिलाको गोपनियताको हक हनन हुने गरी तस्विर खिचेर पैसा मागेर ब्लयाकमेल गरिएको छ । अडियोमा सुन्दा यो घटना सामान्य होइन् । यस्तो असमान्य घटनाको छानबिनका लागि सरकार कति गम्भीर ढंगले लाग्छ, त्यो हेर्न बाँकी छ । राजनीतिमा मौलाएको अपराधीकरण र अराजकतालाई निमिट्यान्न गर्नका लागि यो एउटा प्रस्थानविन्दु हो, सरकार यो प्रकरणलाई सामान्य होइन्, राजनीतिमा मौलाएको अपराधिकरण र अराजकता अन्त्यको महत्वपूर्ण खुड्किलो भएकाले निष्पक्ष छानबिन अघि बढाऊ ।